Da ka Maitshaphrang Academic Award ai ka KSU Thangrain sha ki samla ba pass bha

Syllad | The Rising MeghalayaSeptember 19, 2021

Ka KSU Thangraiñ Unit ka la pynkup burom ïaka khynnah bad samla kiba pass bha haki kyrdan bapher bapher kiba na ka shnong Thangrain da ka Maitshaphrang Academic Award.

Ïaka jingïalang pynkup burom la pynlong haka sngi Saitjain bad iaka jingialang la pynïaid da u Chanbor War General Secretary Nartiang Circle.

Kane ka jingpynkup burom kala pynlong kum shibynta ban ai mynsiem shuh shuh ïaki khun samla ka shnong ban trei shitom haki jingpule jong ki.

La ïadonlang ha kane ka jingialang pynkup burom naduh Reuben Najiar Assistant Education Secretary KSU central body, u Laitphar Syngkrem vice president KSU Jaintia Hills District Unit, u Leningrad Tariang Organising Secretary Jaintia Hills District Unit bad ki dkhot naki Unit bad Circle bapher bapher kumjuh ki nongïalam shnong.

U Reuben Najiar Assistant Education Secretary ula ai ka jingïaroh ïaki samla kiba la wanrah nam ka burom ymtang ïalade shimet hynrei ïaka ïing ka sem bad ula ai ka jingkitbok kitrwiang bad ka jingkyrkhu kyrdoh ba kin nangkiew shaphrang haki jingpule puthi jong ki.

Ha katei kajuh ka sngi ka KSU Thangraiñ Unit ka la kner kti jingïarap da ki marbam sha ki khun swet ba don haka shnong. La pynkut ïaka jingïalang da ka jingot ïa u cake kum ka dak ka jingkynmaw burom ïaka jingdap shisnem ka jingïaid lynti jong ka Unit.