Da ka jingiakop tied Bom bad Ka Siang ka Pha, pynlong ka KKC Seinraij, Jowai

Syllad | The Rising MeghalayaJune 23, 2025

Ka Khynroo Khyllood Committee, Seiñraij Jowai ryngkat ka jingiatreilang ka Dorbar Niam haka 21 tarik Jylliew kala pynlong iaka jingiakynduh lang ba kyrpang ha madan Knia Pyrthat, Dulong Poh-hali.

Iaka jingialang la pyniaid da u Ma Raymond Nartiang Pator ka Raid Jowai bad la ioh ka nguhblei nguh syiem na u Ma Samboon Siangbood Langdoh ka Raid Jowai.

Ki samla kiba ai jingkren ki long u Sienmiki Lato Seinraij Jowai uba la kren halor ka phang “Ki khynroo Khyllood ha ka Tipkur Tipkha” u Kunemiki Passah Seinraij Ummulong halor ka phang “Ki khynroo khyllood ha i maia niam” bad u Sanhiwot Kyndiah Seiñraij Shillong halor ka phang “Ki khynroo khyllood ha ka Sngi Kylliang ka Nongkylliang”.

Kaba kham kyrpang shuh shuh ha kane ka sngi, dei ka jingiohlad jong ki samla ban pyni iaka sap ka phong lyngba ka jingiakop tied Bom katba na ka bynta ki samla kynthei la pynlong iaka jingiakop “Ka Siang Ka Pha” kaba dei kawei na ki jinglehniam ba kyrpang jong ki khun ka Niamtre ha man ki iing ki sem haka por Behdieñkhlam.

Lyngba ka jingriew ka bom, ka dorbar kala long kaba shongshit bad shongkun shongkhia ha kaba ki samla na man ki dong kila kiew rynsan ban pyni iaka sap ka phong bad ka rukom pyndep niam haka por Behdieñkhlam.

Shwa ban poi ka bynta kaba kut jong ka jingiakynduh lang, u Ma Womlin Pakyntieñ, Kñi ka Kur Pakyntieñ kum uwei na ki riew rangbah ka Raid ula kren kyntu iaki samla halor ka phang “I tip niam Tip rukom ki khynroo khyllood wa man i ku ka Niamtre”.

Ki dong ki shnong kiba iashim bynta ha ka jingiakop tied Bom ki long ka Panaliar, Loomkyrwiang, Dulong, Loomiongkjam, Tpep-pale, Loompyrdi Iongpiah katba ha Ka Siang Ka Pha ki long ka Panaliar, Loomkyrwiang, Loompyrdi Iongpiah, Dulong bad Loomiongkjam.