Da ka jingiakop jngi shiteng synia yn pynlong ka Forever Young

Syllad | The Rising MeghalayaDecember 29, 2023

Ka Forever Young mynta ka kynti ruh kan pynlong biang ia ka jingiakop jngi shiteng synia ha ka sien kaba 26 (26th Midnight Swim) ha ka 31 tarik Nohprah 2023 hapoh ka pung jngi Cronoline Swimming Pool.

Ka jingpynlong ia kane ka jingiakop jngi ka long shibynta ban pdiang sngewbha ia u snem thymmai 2024 ha ryngkat bad ka jingduwai ha U Trai Kynrad ba un ai bor ban lah ban iakhun pyrshah ia ki jingeh ba ngin iakynduh ha une u snem thymmai.

Na ka liang u Bah M Thabah General Secretary lyngba une u kyrwoh u la ong ruh ba ha kane ka jingiakop jngi kaba mynta u snem yn buh haduh hynniew ton u thah ha katei ka pung jngi.

Ha kajuh ka por la kyrpad ia kito kiba kwah ban wan iashim bynta ba kim bit ban dih kino kino ki jingdih pynbuaid shwa ban wan iashim bynta ha katei ka jingiakop jngi namar ioh ka pynduh noh ia ka mynsiem iakhun jong ki.