Da ka jaka kaba 5000 sqft ai sngewbha ka Sorkar sha ka KAS ban tei ia ka jaka treikam

Syllad | The Rising MeghalayaAugust 26, 2023

Ka tnat Art and Culture ka sorkar jylla ha ka sngi Thohdieng ba la lah ka la rai ban ai da ka  jaka kaba ha ka jingheh kaba 5000 Sqft kaba don ha Mawlai Iewrynghep sha ka Khasi Author Society (KAS) na ka bynta ban tei ia ka ophis treikam bathymmai jong ka.

Ia kane ka rai la pynbna da u Myntri ka tnat Arts and Culture bah Paul Lyngdoh uba la pynpaw ba ka jingpynioh ia kane ka jaka na ka bynta ka KAS ban tei ia ka jaka treikam ne ka ophis ka long ruh ban ai mynsiem ia kane ka seng ha ka jingiakhun ban ioh iaka jingithuh ia ka ktien Khasi ha ka khyrnit kaba phra jong ka riti synshar ka ri India.

Nalor kata u Bah Paul u la ong ba ha ka jingbteng ban iakhun ban shah kynthup ia ka ktien Khasi hapoh ka khyrnit kaba phra jong ka riti synshar ka ri India, bad lyngba kiba buntylli ki jingiamir jingmut bad ka KAS, mynta ka sorkar ka la shim ia ka rai ban pynioh da katei ka jaka ha Mawlai na ka bynta ban tei ia ka ophis treikam jong ka.

Ha kajuh ka por u la pynpaw ruh ba ka KAS ka don jingthmu ban pynlong da ka National Seminar ha nongbah Delhi bad ban shongkyllain myngngor ha Jantar Mantar kum ka dak ban pyni iaka jingiakhun ban ioh ka jingithuh ia ka ktien Khasi.