Da ka Health Camp pynlong ka JHDS bad JOCHA haka shnong Kyndongtuber, myntoi da ki spah ngut

Syllad | The Rising MeghalayaSeptember 5, 2025

Kum shibynta ban pynshlur ia ki briew ban leh adkar ha ka liang ka koit ka khiah, khamtam kiba na ki thain nongkyndong, ka Jaintia Hills Development Society (JHDS) ryngkat ka Jowai Community Health Association (JOCHA) bad ka KHUBLEI Germany, ki la pynlong ia ka prokram jingai jingsumar (General Health Camp) ha shnong Kyndongtuber ha ka 4 tarik Nailur.

Ha kane ka Health Camp, la wan iashim bynta da ki spah ngut ki nongshong shnong kiba naduh ki longkmie, ki longkpa, ki tymmen bad ki khynnah rit. Haka sngi, haduh 6 ngut ki Doctor ki la wan ai ka jingshakri mon sngewbha bad jingiaroh ia ki nongpyniaid.

Hashwa ban pynlong iaka jingeksamin bad ai dawai ei, la pynlong iaka jingialang kaba lyngkot kaba la pyniaid da ka Kong Juliana Pakma, kaba la ai ka jingiaroh ia ki nongpyniaid jong kitei ki kynhun kiba la shim ia kane ka sienjam ban iarap ia ki nongkyndong.

Ha kajuh ka por, ki nongtrei jong ka Meghalaya Aids Control Society (MACS) bad ka District Tuberculosis Office (DTO/CUM DACO) kila ai ka jingpynshai bad jinghikai halor ki lad jingiarap ba ki ai khnang ban pynduna ia ka jingsaphriang jong ki jingpang HIV bad TB.

Ha kane ka jingialang la iadonlang ruh u Director ka JHDS, u Fr. Manbha Pakem; ka Sr. Beatric Maring, President JOCHA; ka Dr. P. Lamare, District Tuberculosis Officer Jaintia Hills; u Dr. M.H. Borbhuya, Medical Officer Sahsniang PHC; ka Dr. P. Dkhar; ka Dr. Mini Shadap; ka Dr. Santona Synnah; bad ka Dr. Wandaplin Suchiang.