Da ka Curfew miet ba ar bnai pynjari ka Sorkar ha khappud ka Jylla bad ka ri Bangladesh 

Syllad | The Rising MeghalayaMay 9, 2025

Ka Sorkar Jylla haka 8 tarik Jymmang ka la pynjari mardor da ka curfew miet kaba ar bnai kynthih hapoh ka kyndon 163 BNSS ha ki jaka khappud ka Jylla bad ka ri Bangladesh khnang ban khanglad ia ki kam rungtuh jong ki riew bymman bad ki kynhun kieng atiar.

Ka District Magistrate ka East Khasi Hills District ka Kong RM Kurbah ka pyntip ba kane ka jingpynjari ia kane ka Curfew miet kan treikam ha ki jaka kiba hap hapoh ka 1 kilometre radius na u Zero Line jong u pud u sam hadpeng ka India Bangladesh ka ban sdang naduh ka por 8 baje janmiet haduh 6 baje mynstep man la ka sngi.

U District Magistrate, West Jaintia Hills District u Abhinav Kumar Singh u pyntip ba kane ka Curfew miet kan treikam mardor naduh ka por 8 baje mynmiet haduh 6 baje mynstep ha ki jaka kiba hap hapoh ka 200-meter na u Zero Line man la ka sngi.

Katba u District Magistrate ka East Jaintia Hills u Shivansh Awasthi ula pynjari iaka curfew 500 metre na Zero Line aduh ka por 8 baje mynmiet haduh 6 baje mynstep man la ka sngi.

Kane ka hukum ka khang pyrshah ruh ia ka leit ka wan jong ki briew ha ki jaka khappud da ka jingthmu ban jam lyngba ia u pud u sam bad ka Bangladesh lane ban wan rung sha ki bynta khappud jong ka India.               

Nalor kata la khang pyrshah ruh ban pynlong ia kino kino ki jingiaid paidbah ba khlem ioh jingbit lane ki jingialang ba beain palat ia ka san ngut lane ban rah ia ki tiar pynmynsaw bad kiwei ki tiar ia kiba lah ban pyndonkam kum ki tiar pynmynsaw, kata kum ki dieng, nar rod ne ki maw ha ki bynta khappud ka India-Bangladesh lane ban leh ia kino kino ki kam beain kum ki kam khaii tuh ia ki masi, ki mar ki mata, u kwah, tympew, dohkha tyrkhong, biri sikret, slasha bad kiwei kiwei.        

La pynmih ia kane ka hukum da kaba khmih ia ka jinglong jingman ba mynta ha Bangladesh ha kaba ka don ka jingma na ki kam rungtuh jong ki briew, ki dkhot jong ki seng lehnoh, ki nongkhaii tuh bad kiwei pat ki kam bymmah ha ki jaka khappud ka India-Bangladesh.   

Ki jaka khappud ka East Khasi Hills ki bym pat ker sainar shiah ki dei kiba don jingma na ka jingwan rung ki nongbuhai shnong beain, ki dkhot ki kynhun runar kiba don jingiadei bad ki kynhun pyrshah ri kynthup ia ki seng lehnoh kiba lah ban ialum paidbah hajan ki bynta khappud jong ka ri ha ka por mynmiet na ka bynta ban bteng ia ki kam bymman.                 

Ka hukum ka la ong ruh ba kiba kum kine ki kam beain lada ym lah ban tehlakam ki lah ban lam sha u pud ban ym lah ban tehlakam ia ka jingwan rungtuh bad ka ban buh jingma ia ka shongsuk shongsain hapoh ki District, ka Jylla bad ka Ri hi baroh kawei.