Da ka buit Japan ban pynrben ia ki khlaw ha ka Jylla; jurip u CM ia ka khlaw Mawsharoh

Syllad | The Rising MeghalayaMay 10, 2025

Ka Meghalya ka la shim ia ka sienjam kaba khraw na ka bynta ban iada ia ka mariang da kaba pyndonkam ki buit jong u Miyawaki ban pynrben ia ki khlaw ki btap ha ka rukom kaba sted bad kaba seisoh.

Kane ka buit ka dei kaba la shem da u Botanist na Japan u Akira Miyawaki bad ia kaba mynta la pyntreikam ha kylleng ka jylla shibynta jong ka project pynrben biang ia ki khlaw ki btap hapoh ka jingialam da ka Tnad Soil and Water Conservation ka Sorkar Meghalaya.

U Myntri Rangbah ka Jylla u Conrad K Sangma u la shim ia ka bynta kaba kongsan na ka bynta ban pynneh pynsah ia ka mariang. U la pynpaw ka jingsngewkhia kaba jur halor ka jingpom pathar ia ki dieng ha kylleng ka jylla bad u la shim ia ki sienjam na ka bynta ban pynjyrngam biang ia ki khlaw ki btap lyngba ki prokram bapher bapher.

Ban kyrshan ia kane ka jingpyrshang, ka sorkar ka la wanrah ia shibun ki prokram kaba kynthup ia ka Green Meghalaya bad ka la iatreilang bad ki kynhun bapher bapher ban pyntreikam ia ki prokram kiba iadei bad ka jingpynrben pat ia ki khlaw ki btap. Ka sorkar jylla ka la ai ruh ia ka song jingiarap pisa lyngba ka Payment for Ecosystem Services (PES) na ka bynta ban pynneh pynsah ia ki khlaw ki btap.

Ha ka 8 tarik Jymmang u CM u la leit jngoh ia ka khlaw Miyawaki ha Mawsharoh, Ummir ha East Khasi Hills ha kaba la pyndonkam ia ka buit Miyawaki ban pynrben ia ka khlaw kaba don ha ka jaka kaba heh 1.5 hectare. Kumba ka long mynta ia kiba kum kine ki project la pyntreikam ruh ha ka jaka kaba ha ka jingheh kaba kot haduh haduh 25,000 hectare ha kylleng ka Jylla. 

Na ka liang ki ophisar na ka tnad Soil and Water Conservation ki la batai kumno ba ka buit Miyawaki ka la iarap ban pynrben pat ia ki khlaw ki btap ha ki sawdong sawkun. Kane ka buit ka kynthup ia ka jingthung ia ki dieng kiba mih hi ha ka thain kiba la thung marjan kaba lam sha ka jingroi sted jong ki khlaw ki btap.Kine ki khlaw ki kham san kloi haba ia nujor bad ki rukom thung tynrai bad ki bym da donkam palat ha kaba iadei bad ki rukom sumar.

Ia kane ka project la pyntreikam da ka jngkyrshan radbah jong ki nongshong shnong kiba iashim bynta shitrhem ha kaba thung ia ki dieng bad ban sumar ia ka khlaw. Ka Miyawaki forest plantation ba nyngkong eh ha Meghalaya ka la sdang lai snem mynshwa ha Rilum Garo kum ka project pyrshang.

“Ia kane ka project yn sa nangpyniar sha kylleng ka Jylla kum kawei na ki sienjam ban pynrben biang ia ki khlaw ki btap” ong u Myntri Rangbah.