Da i rah lama Iong ha Tuber Kmaichnong heiyatoh wei chah dat ki yahkhmat ka chnong

Syllad | The Rising MeghalayaJanuary 9, 2024

Ka Dorbar Chnong Tuber Kmaichnong dei sniawkhia yei chah dat pynmynsoo ki yahkhmat ka chnong wa kynthup iow Micky Lyngdoh, Waheh Chnong wa u Denis Lyngdoh, Secretary IVCS kamjuh Chairman Chnong Tuber Kmaichnong darai ko deiwi I sur wow pynman i rah lama iong ha ka 10 arik Duiatra nadooh I por 8.00 waje I step I wow man ha madan Yurim, Khliehpynthor.

Ini I rah lama Iong u man ko ka dak wow pynioo hakhmat ka pyrthai wa ka Dorbar Chnong yien tylli ko wow pyrchah yei sih wei wow pynrem joor yei leh u Training Phawa wa na ka jooh ka chnong wa da jia ha ka miet 3 tarik Duiatra ha chnong Tuber Kmaichnong.

Kamtae ka Dorbar Chnong khut kyrpad ko ya ki khon ka Tuber Kmaichnong waroh nadooh ki manbei manpa, khynroo khyllood wow yamih paidbah ryntih ha katai ka sngi naman ki yung ki sem iow pynioo cha ka pyrthai  wa kam ki nongchong chnong ym em u kwah ki wow ioo u sakhi yakam kini ki kam u Training Phawa, kiwa wanrah I sniaw yapher, yasih yaroi wei pyndooh leh yei chongsuk chongsain ka imlang sahlang iong ka chnong ka thain, ka ri wa ka jaitbru.