COVID-19: Sdang ki sister Jowai Diocese ban suh ïaki mask, buh thong ban suh 10 hajar 3 sngi

Syllad | The Rising MeghalayaApril 7, 2020

Ka Jowai Diocese kumba kala pynbna ban synñiang da ki mask sha ka sorkar jylla haduh 10 hajar tylli, mynta ka sngi lyngba ka Jaintia Hills Development Society (JHDS) kaba dei ka Social Wing jong ka Jyllaniam Jowai ka la sdang ban suh ïa kine ki mask ban da ïaka khmut bad ka ktien ban ïakhun ïaka khlam coronavirus.

Ka Jaintia Hills Development Society kaba shimti ban suh ïa kine ki mask hapoh ka jingialam jong u Fr. Manbha Pakem uba long u Director JHDS ryngkat bad u Bah Denis Kurkalang uba long u Coordinator JHDS ha ryngkat ka jingkyrshan ki sister jong ki convent bapher bapher kila sdang ban suh ïa kine ki mask ha Rilum Jaiñtia.

Ïa kine ki mask 10 hajar tylli ka JHDS kan pyndep hapoh lai sngi.

Baroh ki sister da ka mynsiem kaba snngewkhia kila sdang ban suk ïa kine ki mask khlem kano kano ka jingsiew.

U Bishop jong ka Jyllaniam Jowai, Most Rev. Victor Lyngdoh u la ai khublei kyrpang ïa ki Sister kiba la ialeh shitom ban shna ia ki tei ki Mask da la ka mon sngewbha bad u la ai khublei ruh ia u Deputy Commissioner ka West Jaintia Hills Ma Garod LSN Dykes u ba la ïarap ban ai sngewbha ia ki jaiñ lyngba ka Department jong ka District Industries Centre West Jaintia Hills District.