Chongkun ka yachemlang ha ka 1st Kiang Nangbah Youth Conference

Syllad | The Rising MeghalayaDecember 29, 2023

Ki khon khynroo khyllood ka Niamtre na ki 18 tylli ki Seiñraij da wan chimbynta ki ha ka yachemlang kawa tip kam ka ‘1st Kiang Nangbah Youth Conference’ wa pynlai da ka Khynroo Khyllood Committee yong ka Seiñraij Jowai ryngkat ka Lei Synshar Cultural Society.

Ya kani ka yachemlang ki da pynman ynne ha Iungwalieh ka Dorbar Chnong Dulong heiwa u Pearlet Toi u Chief Executive Officer, Meghalaya Khaddi Village Industry Board da man u kam u kongsan.

Kani ka yachemlang ki man ko chibynta i kynmoo warom ya ka lyngkhooh snem wa 161 wa yap u Khlawait ka Ri Khad-Ar Dolloi, U Woh Kiang Nangbah.

Ya ka yalang da pynlai da u Kamnipaia Challam uwa man u General Secretary Lei Synshar Cultural Society wei da yoh ki kyntien ngoohblai na u Ebormi Suting uwa man u dkhot KKC Seiñraij Jowai.

U President ka Seiñraij Jowai u Hercules Toi hawa klam chaphang u Kiang Nangbah, da ong u wa u Kiang Nangbah man u du kam u warep uwa dang khynroo wei hawa yoo u ya ki kaam ka sorkar pharæng wa lehbeiñ ki ya ki kynthai khynnah da chlur u wow yieñ pyrchah ka sorkar pharæng.

Hawa e mynsien ya ki khynroo khyllood won, u Hercules Toi da kyntu u ya ki wow man kiwa chlur namar ka por samla kadei ka por kaba kyrpang dooh wow pynkhreh bha pynyaki hi la hei puræ puthi, u thooh kreh næ wow synñiang chemphang, i tip ya ka niam ka rukom, ka imlang sahlang, ka ri wa ka jaitbru.

Chooh chooh da ong u wa i por khynroo wa dang khlan bha i pyrkhat pyrdaiñ, ha i bor i dog i pran, i chynna jngai, wei ha i chemphang lada ki khynroo em ki i raikut chwa wow leh ya iwon iwon i kaam wa bha nadooh mynsien.

U Pearlet Toi da ong wa ka 30 tarik Kmaichonglad toh ka sngi yaam bru neibhah wa ka sorkar pharæng da chim ko yei mynsien u Woh Kiang Nangbah.

Da kyntu joor u ya ki khynroo khyllood ka juk wa katni wow man kiwa chlur neibhah wow im hei tieñ ka imlang sahlang leh daw sahdien ko.

Ki bru chemphang kiwa da wan e klam toh u Wansalan E. Dhar uwa da batai hajrong ka phang ‘Kiang Nangbah kam u khon dap chynrang’, u Chanhun Laloo uwa da batai hajrong ka phang ‘Ki kaam wa chemphang wa tule yei suk ka pateiñ’.