Byrthen ka WJSU ban mudui sha ka iingbishar halor ka jingshna madan plastic ha Ladjaplem

Syllad | The Rising MeghalayaJuly 4, 2025

Ka War Jaintia Student Union (WJSU) kala byrthen ban tied jingkhang jong ka iingbishar Meghalaya High Court halor ka kynnoh pyndonkam bakla iaka pisa haba shna iaka madan Synthetic Football Turf ha Ladjaplem, Amlarem Civil Sub Division kaba ka jingpyntrei ka dang trei shait shait mynta.

Ka WJSU bad nongialam naki synjuk ialehkai bapher ka thain War Jaintia hadien ka jingialang iathir jingmut halor ka jingshna ia kane ka madan haka 28 tarik Jylliew bnai bala dep kala rai ban mudui sha ka iing bishar.

U Chief Adviser WJSU Alban K. Gashnga, General Secretary WJSU Everest Langstang, Vice President Heartcasing Dkhar kila pynpaw ka jingsngew bynniaw bad kynnoh bala pyndonkam bakla iaka pisa ha kaba shna ia katei ka madan kaba long kumba shna iaka sem ri mrad.

Katba u Everest Langstang ula pyni paidbah iaka jubab RTI ba la ioh pdiang naka nodal agency ba pyniaid iaka jingshna iaka madan ka State Sports Council Meghalaya, Shillong bad katkum ka RTI ula ong ka project ka kot sha ka T.7.93 Klur tyngka.

Ula kynnoh ba ka jingmang pisa kala kham palat ban iaki madan ialehkai football ha Ri Europe, hynrei haba pyntrei iaka madan ka long kum ka jaka pynialehkai shrieh kaba pyni ba ki ialehkai iaka hok jong u paidbah.

Ha kane ka sngi ka WJSU ryngkat ki nongialam bad dkhot synjuk ialehkai kila jurip iaki sawdon sawkun jong ka madan bad lap ruh ia kiba bun bah ki jingduna kynthup ki Synthetic Football Turf ba la buh stock lypa ruh ki long kum third class carpet, ka jingat phyllung jong ka madan, ka jingbym biang ka rukom ker sainar, kynroh bad side drainage nalor kiwei kiwei ki jingduna, la kynnoh ka WJSU.