Byrthen ka KSU Jowai ban khang khyrdep iaki dukan bar jylla

Syllad | The Rising MeghalayaApril 24, 2021

Ka Khasi Students’ Union Jowai Unit kala byrthen ban khang shi syndon iaki dukan bar jylla kiba ym don trading license ban khaii pateng hapoh u pud u ang ka Jaintia Hills Autonomous District Council (JHADC).

Ka KSU kala rai ban khang ia ki dukan bar jylla kiba ym biang kot sla hadien ka jingwan iakynduh ia u EM incharge ka tnad Taxation u ma Wining Garland Sungoh haka sngi Thohdieng.

U president KSU Jowai, Unit u E. Phawa bad u publicity secretary KSU Jowai unit u N Shadap kila ai da ka dorkhat ha u EM hadien bala kut ka jingai por iaka konsil ban khynra iaki dukan bar jylla kiba ym biang kot biang sla ban kamai kajih ha kane ka district. Ka KSU kala ong ruh ba ki don ki dukan bar jylla kiba don tang kawei ka license pynban ki buh ar lai tylli ki dukan kaba ktah iaka konsil kumjuh iaki trai ri ban buh dukan lane ban seng kano kano ka kam ban khaii pateng.

Ka KSU kala rai ban tynrong halade iaka jingkitkhlieh ban khang shisyndon ia kum kine ki dukan kiba knieh iaka kamai ka kjih jong ki trai ri hadien ba ka konsil kala leh bymsuidniew ban khynra iaki dukan kiba pyniaid da ki bar jylla.