Byrngem ujor mukotduma u MDC Tura ia ki CM Garo halor ka jingkynnoh shukor ia ki trai muluk

Syllad | The Rising MeghalayaMay 26, 2025

U MDC ka BJP na Tura uba dei ruh u Chairman barim jong ka seng kieng atiar ba iapait na ka Achik National Volunteers Council – ka (ANVC-B) u Bernard N Marak u la byrthen ban ujor mukotduma pyrshah ia ki Myntri Rangbah Garo halor ka jingkynnoh ba ki la shukor ia ki trai muluk da kaba pynkhein ia ka jingiateh ba lai liang (Tripartite Agreement) ba la iasoi hapdeng ka Sorkar Pdeng, Sorkar Jylla bad ka ANVC.

U la dawa ruh na ka sorkar jylla ba kan khot pynlong ia ka jingialang bad ki nongialam jong ka ANVC kaba la pynduh noh hashwa ban shim rai halor ka mat kaba iadei bad ka Tura Medical College.

Lyngba u kyrwoh u Bernard u la ong ba ka Tura Medical College ka dei ka jingmih na ka jingiateh ba lai liang ba la iasoi da ki kynhun ka ANVC ha u snem 2014 bad ka sorkar BJP ha Delhi bad ka sorkar Jylla.

“Ki Myntri Rangbah Garo ki la shet kylla ia ki jingmyntoi jong ki paidbah da kaba pynslem ban pyntreikam ia ka jingiateh kular. Ki la pynkhein ruh ia ki mat ba la iakut ha ka jingiateh kular. Ngim don da kiwei pat ki lad hynrei ban ujor ia ki da ka lynti jong ka ain namar ka jingpynkhein ia ka jingiateh kular,” u la ong bad bynrap, “La pynthikna ha ngi ban pynioh ia ka jingim kaba kham biang lyngba kane ka jingialeh lai liang, hynrei ngi la shah pynkylla sohpdung, shah kem bad shah pynngat ha ki case bapher bapher. Mynta ka jingialeh pyrshah ia ka sorkar lyngba ka lynti jong ka ain ka dei satang kane ka lynti na ka bynta jong ngi.”

U Marak u la ong ruh ba hadien ka jingiasoi ia ka jingmynjur, ka Jylla ka dei ia ka ban thaw ia ka State Level Monitoring Committee bad ban pynlong ia ki jingialang na ka por sha ka por ban buddien ia ka jingpyntreikam ia ka jingiateh ba lai liang, hynrei mynta lah palat shiphew snem kynthih ki la shukor ia ngi da ka jingai jingkyrmen kaba lamler.

“Ka la iaid palat 10 snem hynrei ym shym la thaw ia ki committee bad ym shym la pynlong ia ki jingialang ban buddien ia kane ka jngiateh. Ka jingiateh ka pynleit jingmut ban pynkhlain ia ka rukom synshar tynrai, ban kyntiew ia ki kam synshar shnong, ban pynkynriah ia ki 13 tylli ki tnad, ka jingbei tyngka kaba beit beit (director funding) bad kiwei kiwei.”

Une u nongialam ka BJP u la kynnoh ruh ia ka sorkar jylla halor ka jingshim kabu ia ki jingmyntoi sha ki tnad ka jylla bad ka sorkar NPP, ha GHADC ka la pyndonkam bakla ia ka pisa ka sorkar pdeng pyrshah ia ka GST ha kaba la pan ia ka jingpynshai kaba bunsien   na ka GHADC.

“Ha ka liang ka koit ka khiah, pule puthi, transport, forest, registration ia kiba kha bad kiba khlad, ka jingai ST certificate, ki kot ki sla ba iadei bad ki jaka puta kum ka Non encumbrance, PRC bad kiwei la shim beain da ka jylla ha ka jaka ban ai sha ki Autonomous District Council (ADC),” u la bynrap.

Nalor kata une u MDC ka Tura u la daw ruh na u Myntri Rangbah ka Jylla u Conrad K Sangma ba u dei ban pynshisha ia ka jinglong nongialam jong u da kaba burom ia ka jingiateh lai liang ha ka jaka ban pynmih ia ki jingkren bym don jingkitkhlieh halor ki project ba la mang lyngba ka jingiateh kular ba lai liang.

Ka Jylla bad ka Sorkar Pdeng ki la pynkhein ia ka jingiateh ba la iasoi ha u 2014 namar ki la pulom ban pyniaid ia ki Monitoring Committee bad ban pynlong ia ki jingialang man la ka hynriew bnai. Ki kynhun ka ANVC ki la shah shukor bad ki trai muluk ki la shah shukor bad ia ki project la knieh da ka sorkar jylla kaba la pynkit ram ia ki ADC.

“Kumta u Myntri Rangbah u dei ban khot pynlong shwa ia ka jingialang hashwa ban shim ia kino kino ki rai kiba iadei bad ka Tura Medical College,” bynrap shuh shuh une u MDC ka Tura.