Byrngem u MDC ban mudui mukotduma ia ka GHADC lada ym pynshai halor ka jinglum khajna beain

Syllad | The Rising MeghalayaJuly 15, 2025

U MDC ka BJP na Tura u Bernard N Marak u la byrngem ban mudui da ka mukotduma lada ka Garo Hills Autonomous District Council (GHADC) kam lah ban pynshai hapoh ka 10 sngi ha kaba iadei bad ka jingkynnoh lum khajna beain khlem da ioh ka jingmynjur na u Lat kumba la bthah da ka Sixth Schedule jong ka Riti Synshar ri. 

Ha ka shithi sha u Executive Member ka Council u Grahambell A Sangma, u Bernard u la buh jingkylli ia ka bor kaba ka Tnad ka ioh na ka bynta ban bteng ia ka jinglum khajna, khamtam na ki trai shnong riewlum khlem da ioh satia ia ka jingbit katkum ki kyndon jong ki riti synshar ri. 

Une u nongialam ka BJP u la kynnoh ba kane ka jinglum khajna ka long kaba beain bad kaba iaid pyrshah ia ki riti synshar khadar jong ka ri namar khlem da ioh ia ka jingmynjur na u Lat. 

U la ong ruh ba ka GHADC ka la pulom ban siew pynkhuid ia ka tulop kaba la palat 40 bnai jong ki nongtrei wat hapdeng ka jingpynmih pisa lyngba ki jinglum khajna kiba khlem ioh jingbit. 

Kumta u Bernard u la dawa na ka EC ba ka dei ban pynshai mardor halor ka nongrim jong ka ain ban lum khajna khlem ka jingaibor ne mynjur da u Lat ka Jylla. 

U la wad ruh ia ka jingtip balei ba u Executive Member um dei ban shah pynngat ha ka ain namar ka jingpynkhein ia ki kyndon jong ka riti synshar ri, bad bynrap kaei ka jingpynshisha ban lum khajna khlem jingbit katba ki nongtrei ki dang iai mad ia ka jingeh namar ka jingbym ioh tulop mynta la bun bun bnai. 

Kumta u la maham ba lada ka GHADC kam lah ban ai ia ka jubab kaba pynhun hapoh ka 10 sngi kumba la dawa, u la byrngem ban shim da ki lynti jong ka ain, lehse da kaba phah tuklar ha ka Iingkashari ban pynthikna ba ka GHADC ka treikam hapoh ki kyndon jong ka riti synshar jong ka ri.