Byrngem mudui ka MGSPHSVA ia u Myntri Sorkar ba kynnoh khlem nongrim ia ki nongialam

Syllad | The Rising MeghalayaJuly 3, 2025

Ka Meghalaya and Greater Shillong Progressive Hawkers and Street Vendors Association (MGSPHSVA) ka la byrngem ban mudui sha ka ain pyrshah ia u Myntri Sorkar u Bah Paul Lyngdoh namar ka jingkynnoh ba ka don kaei kaei kaba sha lyndet ba ki nongialam jong ka ki la pyrshang borbah ban pynthud ia ka jingpynkynriah ia ki nongdie madan na Khyndailad.

Ha u kyrwoh ba la pyllait haka sngi Balang, u General Secretary u Bah Shane Thabah u la ong ba ka seng ka pyrshah jur ia ka jingkren jong u Bah Paul kumba la sakhi lyngba ki lad pathai khubor, ha kaba u la kynnoh ba ki la pynthud ha kaba iadei bad ka jingpynkynriah ia ki nongdie madan.

“Ngi kyntu ia une u Myntri ba un pynshisha halor kine ki jingkynnoh pyrshah ia ka seng lem kumta ngim banse ban shim da ka lynti jong ka ain pyrshah ia u,” u la maham.

Haba kynthoh ia u Bah Paul halor ka jingbym leh ei ei ha ka por ba u dang bat kum u Myntri ka Tnad Urban Affairs ka jylla, u Bah Thabah u la ong, “Kam long kaba phylla haba phai sha ki jingtreikam jong une u riew sain pyrthei ba un pynmih ia kiba kum kine ki jingkren, hynrei ka long kaba sngew lehrain namar ba shisien u la bat kum u Myntri ka Tnad Urban Affairs u bym ju pyrkhat ne leh ei ei ha kaba iadei bad kane ka phang.”

Nalor kata ka seng ka la kam ruh ba dei ma ka kaba la lamkhmat na ka bynta ban pynthikna halor ka jingpyntreikam ia ka ain ka Sorkar Pdeng halor ka kam shong dukan die madan ha Meghalaya hadien hynniew snem jong ka jingialeh mukotduma.

U Bah Shane u la pynpaw ruh ba ka sorkar ka la pynslem ban pyntreikam ia ka ain bad mynta ka pyrshang ban pynkylla khongpong ia ka jingpyntreikam kaba dei bad kaba shai jong ka.

Katkum ka jingong jong u, ka seng ka pyrshah ia ka jingai laisen beain sha ki nongdie madan ki bym dei hok, ka jingpynduh laisen ia ki nongdie kiba dei hok bad halor ki jingshah kyndang ba dang shen jong ki nongdie madan kaba long beain bad kaba la pynmih ia ka jingklumar ha ka Khyndailad.