Byrngem ka KAS ban leit iakhih biang sha Delhi ban dawa pynrung ia ka ktien Khasi ha ka khyrnit ba phra

Syllad | The Rising MeghalayaJune 9, 2025

Ka seng jong ki nongthoh kot Khasi ka Jylla ka Khasi Authors Society (KAS) ha ka 7 tarik Jylliew ka la byrngem ban leit pynlong biang da ka jingiakhih sha Delhi ban pynkynmaw ia ka Sorkar Pdeng halor ka jingdawa ban pynrung ïa ka ktien Khasi ha ka khyrnit ba phra jong ka Riti Synshar ka ri India.

Ia kane ka KAS ka la pynpaw ha ka jingialang pynthymmai nongkitkam na ka bynta ka samoi treikam 2025-2028 ha kaba la jied biang ia u Prof Dr DRL Nonglait kum u President.

Haba kren sha ki lad pathai khubor hadien ka jingialang u President u Dr Nonglait u la ong ba ha kane ka jingialang ka seng kala shim ïa ka rai ba kan iai buddien ban dawa na ka sorkar jylla ban pynrung noh ia ka Ktien Khasi kum ka ktien sorkar ne ka official language bad ban buddien na ka Tnad kam Pohiing ka Sorkar India ban pynrung ïa ka ktien Khasi hapoh ka khyrnit ba phra ka Riti Synshar ka ri India bad nalor kiwei pat ki mat jingdawa.

Ka KAS kala kular ruh ba kan sa pyndep noh ia ka Khasi Khasi Dictionary ka ban pynbiang ïa ki sur Jingkynnoh ha ki kynktien khasi kaba la lum haduh 22 hajar ki kyntien bad yn sa shon noh ha u bnai Nohprah mynta u snem lyngba ka Art and Culture.

Watla ka society kala dep ban pynlong jingiakhih ha nongbah Delhi ban pynbor ïa ka Sorkar Pdeng ban pynrung ïa ka ka ktein Khasi hynrei ka Society haduh mynta kam shym la shong klikti hynrei sa shiwat ka la byrngem ban leit iakhih biang ha Delhi ban pynkynmaw na ka sorkar pdeng halor ki mat jingdawa ba sah teng.

Kiwei pat ki nongkitkam ka Society ba la jied ha kane ka sngi ki kynthup ia u Vice President Dr K.D Ramsiej, General Secretary Dr Ronald Kharshiing, Joint Secretary Bah E Kharpan, Finance Secretary Bah P Kharshiing, Treasurer Bah Kitbok Nongkhlaw, Audior Dr Thomlin Lynshing, Secretary Publicity Commitee Dr M.M Khymdeit bad kiwei kiwei.