Byrngem iakhih u Dr Mukul lada ai pyniaid ka Sorkar ia ka Tura Medical College sha ki kynhun shimet

Syllad | The Rising MeghalayaMay 24, 2025

U Nongialam ka Liang Pyrshah u Dr Mukul Sangma haka sngi Thohdieng u la byrthen ban pynlong da ka jingiakhih pyrshah ia ka Sorkar Jylla lada kam lah ban pynkylla ia ka rai  ban ai pyniaid ia ka Tura Medical College sha ki kynhun shimet.

Haba shim ia kane ka ri kum kaba long pyrshah ia u paidbah, u Mukul u la maham ba kane ka rai kan sa ktah jur bha na ka bynta ka lawei.

“Nga kyntu ia ki paidbah ba kin iasnohkti lang bad nga ha ka jingiakhih namar ngan sa khot pynlong da ka jingiakhih bad ngan sa iakren bad ki nongshong shnong ha kaba ngin dawa ia ka sorkar, bad lada ka sorkar kam pynsngap kumta ruh ngin iaid shakhmat ban pynlong ia ka jingiakhih,” ong une u Myntri Rangbah barim ka jylla haba kren sha ki lad pathai khubor.

“Katkum ka jingsngewthuh jong nga bad kito ki briew kiba pyrkhat na ka bynta ka lawei kaba skhem na ka bynta ki nongshong shnong ka jylla, kata da kaba ia ka jingmut halor ki jingmyntoi jong ki samla bad ka pateng ka ban wan, ngi dei ban pynbor lang ia ka sorkar ba ka dei ban weng noh ia kane ka rai bad pyniaid shakhmat ban pyndep ia ka project bad ban seng ia ka Tura Medical College kum ka Medical College Sorkar,” u la bynrap.

U Dr Mukul u pynkynmaw ruh ba ka jingthmu ha kaba seng ia ka Tura Medical College kum ka College Sorkar ka long na ka bynta ban aijingmyntoi ia ki samla jong ka jylla.

U la ong ba ka don ka jingiapher kaba kaba jur hapdeng ka kam sorkar bad ka kam shimet. “Ki kam shimet barabor ki ju pyntreikam ia ia ki sienjam ban thung bad ban beh briew, kata ka mut ba kam don satia ka jingshngain ia ki nongtrei ki ban shah pynrung ha ki kam shimet, bad bynrap, “Ym tang ba phi sdang na ka PPP mode bad hadien phin sa kylla sha ka kam shimet ba pura.”

Nalor kata u la dawa da kaba ong, “Kumta sa shisien nga ong ia ka sorkar ba kan sngewbha ban pynsangeh halor ka jingai pyniaid kam sha ki kynhun shimet, sangeh mardor bad pynkylla ia kane ka rai.”

Haba kylli, une u Nongialam liang pyrshah u la ong ba ka jingmut ka long ban pynthikna ba ki hospital sorkar ki dei ban kham bha ban ia ki hospital shimet bad ki Medical College Sorkar ki dei ban kham bha ban ia ki Medical College ba pyniaid da ki kynhun shimet.