Bynniaw ka JSM bym ithuh ka ophis u DC East Jaintia iaki Waheh Shnong

Syllad | The Rising MeghalayaJune 18, 2020

Ka Jaintia Students’ Movement (JSM) Central Body ka sngewphylla ban iohi lyngba ki lad pathai khubor ba ka ophis U Deputy Commissioner, East Jaintia Hills District kam ithuh iaki Waheh Shnong ban pynshisha iaka jinglong nongshong shnong ki paidbah nongshong shnong ka East Jaintia Hills.

Ha ka jingpynbna u DC haka sngi Balang ba kino kino kiba kwah shongdur Aadhaar ki dei ban pynithuh ialade da kaba rah ki syrnod na ki MLA/Ki Ophisar Sorkar.

Kane ka jingpynlait khubor ka ophis u Deputy Commissioner, East Jaintia ka long na bynta ki to ki paidbah ka East Jaintia Hills ki ba kwah ban shondur Aadhaar Card .

Ka JSM ka buh jingkylli ia ka ophis u DC, hato um pat tip mo ba ki Waheh Shnong bad ka Dorbar Shnong ka don ka bor ba khlain eh ha ka kam shynshar khadar bad ia kaba la tip ruh da ka Ain Sorkar lyngba Ka Aiñ Jaiñtia Hills Autonomous District Council Act 2015 kat kum Ka Kyndon 31(11) ka kren shai kdar ia ka bor u waheh shnong.

Ka JSM ka ong ba kane ka jingpyrshang ka bor district ban iaidlait iaka bor jong ka Dorbar Shnong ka long ka bymlah ban pdiang haka shynshar khadar ka Bri U Hynniewtrep.

“Ki MLA bad ophisar kim lah ban pynthikna ïaka jinglong trai shnong u briew, ngi dawa na u DC ban pyndam ne pynbeit ïaka jingpynbna bad um dei ban iaidlait iaki Waheh shnong ha kaba iadei ki syrnod ban pynithuh bad pynthikna ïaka jinglong nongshong shnong uno uno u briew,” la ong u Publicity Secretary JSM u Deijuhhi Siangshai.