Bym lah ai jingkhein ka EC barim, thung u Dolloi Nongtalang da u Acting Waheh Shnong ha Bakur

Syllad | The Rising MeghalayaApril 10, 2022

U Dolloi ka Elaka Nongtalang Ma Chui Pohlynjar ula thung da u Acting Waheh Shnong haka shnong Bakur na ka bynta 6 bnai hadien bala kut ka samoi treikam u waheh shnong barim bad ka jingbym lah ka EC ban ai iaka jingkhein jingdiah sha paidbah nongshong shnong.

Une u Acting Waheh Shnong uba la mynjur da ka dorbar u dei u ma Wespar Lamin.

Ka Dorbar Shnong Bakur kala khot iaka jingialang jong ka dorbar shnong haka 8 tarik Iaiong (April) bad kala jied ia ki nongkitkam ba thymmai ka Bakur na ka bynta 6 bnai. Ha kane ka dorbar la shimbynta da ki nongshong shnong naduh ki kynthei, ki samla bad ki rangbah ban sngap bad ban iathir jingmut halor ki kaiphod bapher ba pher jong ka EC shnong kaba barim.

Hadien ka jingiathir sani bha u Doloi ka Elaka Nongtalang bad ka Dorbar da kawei ka sur kala shim ia ka iarai ban thung noh da ka EC ba thymmai lane ban thung da u Acting Waheh Shnong ban pyniaid ia ki kam jong ka shnong naka bynta 6 bnai. 

Ha kane ka baroh u nongshong shnong ula mynjur ban jied acting waheh shnong bad ki don lai ngut kiba ialeh ia kane ka kam acting waheh shnong kiba kynthup ia u waheh shnong barim Daniel Khongsit (wahehshong barim), u Wespar Lamin bad u D. Donstand Khonglah. 

Haka jingniew iaka vote u Dolloi ula pynbna ba u ma Wespar Lamin ula jop iaka kam acting waheh shnong ka dorbar shnong Bakur. Ha kane ka sngi la jied ruh ia u Ma Alphonsius Khonglah ban long kum u general secretary bad ia u Ma Luckystar Mannar kum u treasurer. 

Nakaliang u general secretary barim u Ma D. Donstand Khonglah, ula kynnoh ba u Dolloi ka Elaka iaid pyniaid shakhmat iaka dorbar khlem da ioh ban pynsngew iaka report jong ka EC bad ban ai iaka jingkhein jingdiah sha u paidbah.

Ula ong ba na kaliang jong ka EC barim ka pyrshah iaka jingjied ia u Acting Waheh Shnong namar ba u paidbah uba wan haka dorbar um shym la ailad bad kiba wan dorbar ki wan da ka jingthmu ban pynklumar shnong. “Ngim shym la ioh satia ban rah iaka report treikam ka EC bad ban ai iaka jingkhein jingdiah halor jingpynlut pynsep ka shnong,” la ong u ma Khonglah.