Bun bha ki khana jingjop ka tnad pule puthi hynrei bun ki peit tang ia kaei kaba duna: Lahkmen

Syllad | The Rising MeghalayaFebruary 26, 2022

U Myntri ba dei khmih ia ka tnat pule puthi, Ma Lahkmen Rymbui u la ong ba na ka liang ka sorkar jylla, hapoh ka jingialam u Myntri Rangbah u Conrad K Sangma bad u symbud Myntri Rangbah bah Prestone Tynsong, ki la ialeh naka bynta ban peit ia ka bit ka biang jong ka tnat pule puthi ha kane ka jylla.

U Ma Lahkmen u la pynpaw ia kane, ha ka jingleit ban ia synran lang ia u symbud Myntri Rangbah ba dei artad u MLA ka Pynursla u bah Prestone, ia ka jingplie paidbah ia ka Ri War College bad ia ka Cultural Centre, ha Rangthylliang haka sngi Thohdieng.

Shuh shuh u Ma Lahkmen u la ong ba ka tnat pule puthi kam dei satia ka tnat kaba suk bad ka don shibun ki jingeh namar kiba ioh ki dang duna, ki bym ioh ki dang duna, hynrei u sngew kmen ban iathuh ba kane ka sorkar ka dei kaba nyngkong kaba naduh ba la ioh ia la ka jong ka jylla ba pura, kaba tang ha ka shisien jam, ka la lah ba kan ioh ai ia ka jingiarap haduh 9 tylli ki Peoples College ne kiba juh tip ruh kum ki Community College.

U Ma Lahkmen u la ong ruh ba 1400 tam, ki briew ki la ioh ia ka kam hikai da kaba skhem hapoh ka tnat Education, ka daw baroh ka dei namar ba ka sorkar ka kwah ban peit ba ki khynnah skul kidei ban ioh ia ka jingnang ka jingstad.

U bah Lahkmen u la kren ia kiba bun ki mat, ha kaba u la pynpaw ruh ia ka jingeh kaba iadei bad ka jingsiew ia ka tulop, kaba kum ka sorkar, kam shym la shu shong kli kti, pynban ka juh wad ia ki lad ki lynti ne ban iakren bad ka sorkar kmie ban pyllait kloi lan ia ka pisa ne ka bhah, khnang ban ioh ban siew ia ka tulop.

Haba iadei bad ka bai bam ne ka scholarship, u Ma Lahkmen u la iathuh ba ka la don ka por ba la don ym duna ia ka 40 hajar tam ki khynnah ba la ioh, hynrei u dap da ka jingsngewsih pat ba ha u snem ba la dep ki khynnah kiba ioh ki long tang 7 hajar tam, ka daw ka jingioh duna ka dei namar ba la link bad ki bank account, aadhaar ba long kat kum ka jingbthah jong ka sorkar kmie.

Hynrei lyngba ka jingtrei shitom, ka sorkar ha kine ki khyndiat snem ka la ioh ba kan bhah kyrpang ia kumba 200 tam ki skul lower primary sorkar, namar la shem bad iohi ba kiba bun na kum kine ki skul, kim don iaki nongrim kiba bit kiba biang, haba iohi ia kane, ka la pynshon jingmut ia ka sorkar ba da kumno pat kein ban lah ban ai ia kata ka jinghikai kaba dondor ia la ki khynnah lada jia kumne, ia kaba la bynrap lang ha ki Higher bad kumjuh sha ki Secondary School.

U Ma Lahkmen u sngew pat ban ong ba ha kiba bun ki khep ki briew ki kdew tang ia kaei kaba ka sorkar kam lah, hynrei u kam pat ba bun bha ki khana jingjop ne ki success story jong kine ki saw snem kiba la leit, hynrei bunsien ym juh don ba kwah ban peit ia kita kiba bha hynrei la peit tang ia kaei kaba duna.

Haba phai sha ka mang tyngka, u Ma Lahkmen u la ong ba ka bhah ba heh tam na baroh ki tnat dei ka tnat Education, hynrei 90 na ka 100 jong ka bhah la lut noh tang ha ka ban pynbiang ia ka tulop katta ruh khlem dap bad khlem da khein ia ka pisa ba la ioh bhah na ka sorkar kmie.

Dang ha ka taiew ba la dep u bah Lahkmen u iathuh ba u wan na nongbah Delhi ban iakren naka bynta ka jingeh ki SSA bad sngew burom ia ka sorkar India ba ka la dep ba kan pyllait ia ka first instalment bad donkam ia ka second instalment, namar sngewthuh ba ka jinglut kam dei tang da kita ki 10 ne 20 klur ha ka shi bnai, pynban ka jingeh hi ka long ba ka pisa kaba donkam ka long kaba bun.