Buh thong ka Sorkar ban pynbeit ia palat 600 tylli ki skul ban pynduna ia ka jinglut ha kaba siew tulop

Syllad | The Rising MeghalayaMay 28, 2025

Ka Tnad pule puthi ka Jylla ka la buh ia ka thong ban pynbeit ryntih ia palat 600 tylli ki skul sorkar bad Samagra Shiksha Abhiyan (SSA), kiba don lang marjan hapoh ka kylla kaba nyngkong hapoh jong une u snem.

Ka jingthmu halor kane ka long ban pynduna ia ka bhah mang tyngka ha kaba iadei bad ka jingsiew tulop sha ki nonghikai. Kumba ka long mynta, ka Meghalaya ka la pynlut haduh palat T.2400 klur na ka bynta ban siew ia ka tulop jong ki palat 40,000 ngut ki nonghikai ha kaba tang 7000 ngut ki dei ki nonghikai sorkar.

Haba pyntip ia kane haka sngi ba Ar, u Commissioner & Secretary ka Tnad Education u Vijay Kumar Mantri u la ong, “Ngi la pyrshang ban pynbeit ia ki 600 tylli ki skul sorkar bad ki skul SSA kiba ia don lang marjan ha kane ka kylla kaba nyngkong (first phase).”

“Katkum ka nongrim hi ki skul SSA ruh ki long kum ki skul sorkar. Phim lah ban don artylli ki skul sorkar ki ban ia don lang marjan. Kumta, ngin pyrshang ban pynbet bad ngin sa peit katno tylli ki don? Ngi buh ia ka thong na ka bynta 600 tylli ki skul mynta u snem,” u la bynrap.

U Mantri u pyntip ruh ba ka tnad ka pynshlur ruh ia ki skul shimet ba kin sdang noh ia kane ka rukom pynbeit.

“Namar ki don ki skul deficit ha kaba ki nonghikai ki ioh ia ka tulop sorkar. Kumta, ngi la bthah ia ki District School Education Officers (DSEO) ban ialeh ban pynbeit lada jia ba don kano kano ka skul ka bym don khynnah skul, kumta phin pynkynriah ia kine ki nonghikai sha ki skul kiba don marjan kaba don kham bun ki khynnah skul,” u la ong.

Halor ka jingkylli kaba iadei bad ka jingjot jong ki jingtei ne iingskul ha kylleng ka jylla, u Mantri u la pynshai da kaba ong ba ka Meghalaya ka don haduh palat 55,000 ngut ki nonghikai haba ia nujor bad kiwei pat ki jylla ka thain shatei lammihngi, namar kata tang khyndiat ka bhah tyngka ka don na ka bynta ban pynbha ia ki jingtei na ka bynta ki iingskul ha ka jylla.

“Ki jingpynbiang ia ki jingtei ka long shisha ka jingeh kaba khraw shisha. Lada phi peit mynta ia ka mang tyngka ha ka pule puthi, T.2400 klur ka la leit tang sha ka tulop, kumta tang khyndiat eh ka bhah tyngka ka don na ka bynta ban pynbha ia ki jingtei ia ki iingskul,” u la ong.

Watla katta u pyntip ba ka tnad hapoh jong ka Asian Development Bank (ADB) scheme ka la shim ban kyntiew kyrdan ia ki 65 tylli ki skul bad ban tei ia ki kamra klas kiba thymmai.

“Ngi don ruh ia ka mission education bad hapoh jong ka, ar kylla ki la dep bad buntylli ki skul la kynthup lang. Ki dang bun shuh shuh ki skul ki ban shah kynthup ha ka kylla kaba lai ter ter.”

Nalor kata u Commissioner & Secretary u la ong, “Haduh T.2400 klur ka la leit tang ban siew ia ka tulop ki nonghikai, katba na ka bynta ki college ka long sa T.300 klur man la u snem, bad na ka liang ka sorkar ka la kyrshan haduh 40,000 ngut ki nonghikai, bad na kane tang 7000 ngut ki dei ki nonghikai sorkar bad kiba sah ki dei ki nonghikai shimet.