Buh mawnongrim u Vice President ka Ri ban tei ia ka Meghalaya Skill & Innovation Hub ba T.77 klur ha New Shillong

Syllad | The Rising MeghalayaOctober 17, 2024

U Vice President ka Ri India u Jagdeep Dhankhar ha ka 16 tarik u Risaw u la buh ia u mawnongrim na ka bynta ka jingtei ia ka Meghalaya Skill and Innovation Hub ha ka jingiadon lang u Lat ka Jylla u CH Vijayashankar bad u Myntri Rangbah ka Jylla u Conrad K Sangma.

Ha kane ka sngi u Vice President u la pyllait paidbah ruh ia ka CM Business Catalyst: Student B-Plan Challenge bad ka IIM bad halor ka jingiasoi ia ka MoU hapdeng ka UNDP bad ka Sorkar Jylla ban kyntiew ia ki lad sengkam seng jam ha ka Jylla.

Ia ka Meghalaya Skill and Innovation Hub yn tei ha ka jaka kaba heh 6.54 akar ha New Shillong ha ka jinglut ka ban kot sha ka T.77.5 klur. Kane ka jingtei kan pynbiang ia ki jingdonkam jong ki samla ki ban ioh ia ki jinghikai, jingiatreilang bad ka jingiateh ha ka liang ka sengkam sengjam.

Haba kren ha ka jingialang, u Vice President ka Ri u la pyrto ia u Myntri Rangbah ka Jylla u Conrad K Sangma halor ka jingwan rah ia ki prokram bapher bapher ki ban iarap ban pynroi ia ka sap jong ki samla ka Jylla.

U la ong ba ka Skill and Innovation Hub kan iaid ia ka lynti kaba jlan ha ka ban kyntiew ha ka liang ka sengkam sengjam lajong ha ka Jylla. U pynpaw ruh halor ka jingpynkhlain ha ka jingpynmih ia ki briew kiba tbit bad shemphang lyngba ka jingwanrah ia kane ka Centre.

“Ka jingkyntiew ia ka sap jong ki samla ka dei kaba donkam bha ha kane ka por,” ong u Vice President da kaba pynpaw ruh ba u Myntri Rangbahduh ka ri u Narendra Modi u la plie ia ka jingkhang jong ki lad ki kabu na ka bynta ki samla lyngba ki prokram bapher bapher ban sdang ia ki kam ki jam.

Nalor kata u pyntip ruh ba haduh 60,000 klur ka Sorkar Pdeng ka la mang ban pynroi ia ki sap ki phong jong ki 5 lak ngut ki samla ha kine ki san snem ki ban wan hapoh ka ri. “Ka jingpynkup bor ia ki samla kan pynthikna halor ka jingkiew jong ka ioh ka kot hapoh ka ri,” u la ong.

U Lat ka Jylla ha ka jingkren u la kdew halor ka jingkhlain bad ka jingriewspah jong ka Jylla ha ka mei mariang kaba plie ia ki lad ki lynti na ka bynta ki samla ka Jylla.

Katba u Myntri Rangbah ka Jylla u la ong ba ki samla ka Jylla ki long ka bor jong ka Jylla. U la ong ba ka Sorkar Jylla ka la kyrshan borbah ha kaba iadei bad ka bynta jong ka sengkam sengjam bad khnang ban pynbiang ia ka jingduna nongtrei, ka sorkar ka la wanrah ia ka Skill and Innovation Hub.

U Myntri Rangbah u la ong ruh ba haduh 85% na ki nongshong shnong ka Jylla ki dei kiba hapoh ka 45 snem rta.Ki samla ki long ka bor ba khlain bad nongkynti bad ngi la wanrah ia ki prokram  ban pyndonkam ia ka bor ki samla jong ngi.

U la bynrap ruh ba ka sorkar ka la pyntreikam ia ki prokram bapher bapher ha kaba ki samla ki la ioh pdiang ia ki jinghikai khnang ba kin lah ban noh synniang na ka bynta ka jingkiew jong ka Jylla.

Haba kren halor ka jingkyntiew ia ka sengkam sengjam ha ki thain nongkyndong, u Conrad u la ong ba ka sorkar ka la pynlong ia kiba bun ki business plan competition bad aijingkyrshan ia ki nongseng kam sengjam lajong lyngba ki prokram bapher bapher kum ka CM Elevate bad ruh lyngba ki jingiarap pisa.