Buh mawnongrim u Myntri ban tei ia ka madan artificial turf ba T.10 klur ha Nongsder, Ri Bhoi

Syllad | The Rising MeghalayaMay 14, 2025

U Myntri ka Tnad Sports ka Jylla u Bah Shakliar Warjri haka 13 tarik Jymmang u la buh ia u Mawnongrim na ka bynta ban tei ia ka madan ialehkai phutbol artificial turf ha ka shnong Nongsder, Ri-Bhoi District kaba la mang ha ka jinglut kaba T.10 klur.

Ha kane ka sngi la ia don lang u MLA ka Umroi u Bah Damanbait Lamare, u Chief Secretary ka Jylla u Bah DP Wahlang, u DD Shira, MCS, Director ka Tnad Sports & Youth Affairs, ki ophisar na ka Tnad Sports, Ki Rangbah Shnong, Sports Association jong ka thain bad kiwei kiwei.

Ha ka jingkren kum u kongsan u Bah Shakliar Warjri u la pynpaw ia ka jingkmen kaba khraw namar kane kane kan dei ka madan artificial turf kaba ar ba la lah ban wanrah hapoh Ri Bhoi District tang hapoh ki ar snem bad ka ban long shisha ka jingmyntoi kaba khraw na ka bynta ki samla don sap jong ka District kiba la kiew bha ha ka liang ka phutbol.

Kum u Myntri ba dei khmih u pynskhem ruh ia ka jingangnud jong ka sorkar ban pynroi ia ka sports ha ka jylla da kaba ban jur halor ka jingbei tyngka ha ka ban tei ia ki jaka ialehkai da ka jingngeit ba kan iarap ban pynurlong ia ki thong ki ban iahap bad ka sports policy jong ka jylla.

U la kdew ruh halor ki jingjop jong ka sorkar jylla kaba kynthup ha ka jingpynroi ia ki jingtei, ka jingjop ha kaba pynlong ia ka Meghalaya Games mynta lah laisien kynthih bad halor ka jingpynkhreh ban pynlong ia ka National Games in 2027.

Ha kaba iadei bad kane ka madan ka ban tei thymmai, u Myntri u la kular ba kin lah ban pyndep ha ka por kaba biang kumba la buh thong.

Ha kane ka sngi u Myntri u la pynkup burom ruh ia u samla Jeffery Kharmawlong na Nongsder uba la ioh khur ia artylli ki takma rnong na ka bynta ka ri India ha ka  XXIII Asian Arm-Wrestling Championship bad ka XXII Asian Para Arm Wrestling Championship 2025 kaba la long ha  Delhi naduh ka  3 haduh ka 11 Jymmang  2025.