Buh mawnongrim u CM ban tei ia ka Indigenous Cultural Centre ka Seng Khasi ha Mawkhar

Syllad | The Rising MeghalayaMay 16, 2025

U Myntri Rangbah ka Jylla u Conrad K Sangma haka 15 tarik Jymmang u la buh ia u mawnongrim na ka bynta ban tei ia ka Indigenous Cultural Centre jong ka Seng Khasi Kmie ha Mawkhar, Shillong ha ka jingiadon lang u Symbud Myntri Rangbah u Bah Prestone Tynsong, u Myntri ka Tnad Arts & Culture u Bah Paul Lyngdoh, ki nongialam shnong, ki dkhont ka Seng Khasi bad kiwei.

Ia kane ka centre yn tei haka jinglut ka ban kot T.15 klur bad ka dei kaba la thmu ban pynwandur kum ka khyrdop kaba im sha ka pateng jong u Khasi. Kan dei ka jaka ym tang na ka bynta ban pyni ia ki jingleh tynrai hynrei ruh ban bteng ban leh ia ki ban ai pateng bad ban lehkmen.

Ha ka jingkren u Myntri Rangbah u la ong, “Kane kan ym long tang ka jingtei, hynrei ka tynrai jong ka jingialeh ban pynmih ia ka kolshor, ka jaka kaba ka jingithuh kyrpang ia ngi, ki jingleh niam, ka jingngeit bad ka rukom im la tynrai na ka bynta ki pateng ki ban wan.”

“Mynta la palat spah snem ia kiba bun ki jingleh niam ba kongsan la pynlong ha ki jaka madan khlem ki jingtei kiba biang. Ngi la pynbeit da ka jingkut jingmut kaba phalang ia ka jinglong ba kongsan jong ka kolshor ha ki briew jong ngi,” u la bynrap.

Haba kren halor ka jingkongsan ban kyntiew bad pynneh pynsah ia ki jingleh jingkam tynrai, u Conrad u la ong, “Haba ngi kren halor ka jingpynneh pynsah ia ka kolshor, ka rukom im, bad ka histori ka jong ngi, ngi iakren halor ka jingiada ia ka jinglong tynrai jong ngi kum ka jaidbynriew. Ki riti dustur jong ngi, ki jinglehniam, ka ktien ka thylliej bad ka jingngeit kim dei tang ki jingbuh kynmaw jong ka mynnor, hynrei ki dei ki jingpynpaw kiba im bad ka jingithuh ia ka tynrai ka jong ngi.”

Kumjuh haba pynpaw ba ki jaidbynriew riewlum ka thain Shatei Lammihngi ki long kiba kyrpang bad iapher ha kiba bun ki bynta, u CM u la ong, “Ngim pat shym la lah ban buh jingthoh ia ka histori ka jong ngi, ia ka jingngeit ka jong ngi bad ia ka kolshor ka jong ngi. Lyngba ka Chief Minister Research Fellowship (CMRF), na ka liang ka sorkar ka la pynshlur ia ki jingwad bniah khnang ba ka riti dustur bad ka histori ka jong ngi yn lah ban iada bad pynneh pynsah.”

Da kaba pynpaw ia ka jingkyrmen ba kane ka Centre kan long ka jaka ban aijinghikai bad iasam ia ki jingtip, u la ong, “Kane ka Centre ka dei ban pyni bad pynpaw ia ka kolshor ba riewspah jong ngi sha ka pyrthei, bad kan pynlah ia ki samla jong ngi ba kin ioh jingtip bad jinghikai na kiba la san, ki riew shemphang kiba lah ban iasam ia ki jingnang jingtip jong ki bad ka pateng ka ban wan.”

Haba pynpaw ba ka ri India kadei ka ri kaba don ia ki kynhun jaidbynriew bapher bapher, ” u CM u la ong “Ka sorkar jong ngi ka la ju kyrshan ia ki jaidbynriew bapher bapher ban pynneh pynsah ia ka pateng bad ka kolshor ba riewspah jong ki.