Buh mawnongrim u CM ban tei ia ka Additional Secretariat Complex ba T.156 klur ha Dakopgre, Tura

Syllad | The Rising MeghalayaJune 20, 2025

U Myntri Rangbah ka Jylla u Conrad K Sangma haka 19 tarik Jylliew u la leit ban buh ia u mawnongrim na ka bynta ban tei ia ka Additional Secretariat Complex ha Dakopgre, Tura.

Kane ka project kaba kot T.156 klur ka dei ka jingmih na ka jingangnud kaba la slem bha jong ki paidbah nongshong shnong ka Rilum Garo.

“Haba shim ia kane ka project kum ka ban sah histori na ka bynta ki paidbah ka jylla bad khamtam ia ka Rilum Garo, u CM u la ong, ” Ka dei ka sngi na ka bynta iwei pa iwei na ngi ban kynmaw. Ngi dei ban pynpaw ka jingsngewnguh ia u Blei Nongbuh Nongthaw. Ka Additional Secretariat Complex kam dei tang ka jingtei hynrei ka sakhi ka jingpynurlong ia ka jingangnud jong ki briew jong ngi.”

U la ong ruh ba kane ka Additional Secretariat kan ai ka jingshakri ia ki paidbah ka Rilum Garo kiba la mad ia shibun ki jingeh ban ioh ia ki jingshakri bapher bapher lyngba ka sorkar.

“Ki paidbah mynta ki lah ban phaikhmat ba ia kiba bun ki jingshakri lyngba ka sorkar yn sa lah ban ioh na Tura.Kumta kane ka dei ka project kaba kongsan tam na ka bynta ka jylla khamtam ia ka Rilum Garo bad ki briew jong ka,” u la bynrap.

U la pyntip ruh ha ka jingialang halor ka jingiaid shaphrang ha kaba iadei bad ka jingiaid shakhmat ha ka jingpyntrei ia ka Secretariat bathymmai ha Shillong ia kaba la mang haduh T.1800 klur.

“Ngi la shna ia ki jingtei bapher bapher da kaba buh jngmut na ka bynta ki 100 snem ki ban wan. Ngi kwah ban pynthikna bad ki bor synshar ym tang ba kin iajan bad ki paidbah hynrei kiba lah ruh ban ioh ia ka jingshakri kaba pura,” ong u Conrad ha kane ka prokram kaba heh bha ba la wan iashim bynta da haduh kumba 8000 ngut ki briew.

U pyntip ruh ba da ka jingthmu ban pynthikna ia ka roi ka par kaba iaryngkat ha kylleng ka jylla, ka sorkar ka don ia ka jingthmu kaba ryntih ha kaba iadei bad ki lad jingiarap na ka bynta ki District bad ki Block.

“La ki dei ki ophis block bathymmai, ki sub divison barim bad bathymmai, ki district office, ki jingtei kiba iadei bad ki lad jingsumar, ki jingtei jong ki pulit ne ka pule puthi, ngi la pynleit jingmut sha ka roi ka par kaba pura hapoh ka jylla,” u la ong.

“Ka South Garo Hills ka la rakhe ia ka jingdap 33 snem jong ka District haka sngi Balang hynrei baroh kin sa kyndit ba ka jingtei ia ka DC office complex ka dang shu sdang,” u la bynrap.

U la ong ba ka la don ka jingsngewkhia ha kaba iadei bad ka jingduna jong ki jingtei hapoh ka thain bad bynrap ba ka sorkar MDA ka la pynwandur ia ka lynti iaid ban poi sha ka thong khnang ban pynthikna ba ka Meghalaya kan dei kawei na ki jylla kaba biang tam hapoh ka ri.

“Ka sorkar MDA ka la mang ia ka song pisa na ka bynta baroh ki block hapoh ka jylla.Ia baroh ki jingtei ha ki district bad block kynthup ia ki jingtei na ka bynta ki pulit la pynbha lut mynta.Ngi la pynkhlain ruh ia ki jingtei kiba iadei bad ki jaka sumar ha kylleng ka jylla,” u la ong.

Nalor kata u Myntri Rangbah u la shim ruh ia ka kabu ban pyntip ha kaba iadei bad ka jingthmu ban tei ia ka Mini Secretariat ha Jowai bad Pynursla.

U la ong ruh ba kane ka Additional Secretariat ha Dakopgre kan don laitylli ki jingtei ha kaba ia ka Chief Minister’s Complex yn sa pyndep noh hapoh jong u bnai Kyllalyngkot 2027.

“Ngi don ia ka jingthmu ban ioh ban plie noh ia ka CM Complex ha ka 21 tarik Kyllalyngkot 2027, ha kaba kan lah ban ai ia ka jingshakri kaba pura sha ki paidbah nongshong shnong jong ka thain.” U la bynrap ba kane ka Additional Secretariat kan don ia ki kamra jong u CM bad ka kynhun Myntri jong u, Chief Secretary lem bad ki heh ophisar bad kan don ruh ia ki ophis jong ki tnad sorkar bapher bapher.

Ha kane ka jingialang la iadonlang u Lamphang ka Iingdorbar u Thomas A Sangma, Symbud Lamphang u Timothy D Shira, Dy CM Snaiwbhalang Dhar, Myntri Sorkar AT Mondal, Dr Ampareen Lyngdoh, Marcuise Marak, Shakliar Warjri, Rakkam A Sangma, Paul Lyngdoh, AL Hek, Comingone Ymbon bad ki MLA ka Rilum Garo.