Buh maw nongrim ka NABARD bad JHDS ban tei ia ka iew Rural Haat ha Namdong B

Syllad | The Rising MeghalayaJanuary 13, 2024

Ban pynsuk iaka khaii pateng jong ki nongrep haki thain nongkyndong, ka National Bank for Agricultural and Rural Development (NABARD) rynkat ka jingiatreilang ka Jaintia Hills Development Society (JHDS) kila buh thong ban tei iaka iew haka Shnong Namdong B kaba hap hapoh ka West Jaintia Hills District ia kaba yn tip kum ka Rural Haat.

Khlem da pynslem shuh ban pyndep ia kane ka thong, ha ka 12 tarik Kyllalyngkot la buh ia u maw nongrim ban tei noh ia kane ka iing da u Block Development Officer ka Namdong C&RD Block u Ma Heimonmi Niang, uba long u kongsan ha kane ka jingialang ryngkat ka jingiadonlang u Bah Grevile Kharlukhi, Assistant General Manager ka NABARD, kum u Symbud kongsan.

Kiwei de kiba la iadonlang ha kane ka jingialang ki kynthup ia u Director ka JHDS u Fr. Manbha Pakem, u Coordinator ka JHDS u Bah Denis Kurkalang, u waheh Shnong ka Namdong B u Bah Damian S. War bad kiwei de ki riew rangbah.

Ia kane ka iing yn tei haka jaka kaba heh kumba 3000 sq meter ia kaba la ai sngewbha da ka Dorbar shnong bad ka jinglut ha ka ban tei ia kane ka iing kan long 16,66,000 tyngka.