Buh ktem pulit ka Assam ha Saba, pynsangeh ka bor district West Jaintia Hills

Syllad | The Rising MeghalayaApril 22, 2021

Ka bor synshar district jong ka West Jaintia Hills haka sngi Balang kala pynsangeh iaka jingshna ktem Pulit ka Assam ha Saba, ka shnong kaba don hajan Mukroh kiba hap ha khappud Meghalaya- Assam.

Ki Pulit jong ka West Jaintia Hills District hadien ba kila ioh khubor haka jingialam Border Magistrate jong ka West Jaintia Hills District uba long ruh u BDO Laskein ma B Langbang bad ka kynhun pulit haka jingialam u Dy SP (Headquarter) MJ Marngar kila leit ban pynsangeh iaka jingshna ia kane ka ktem pulit jong ka Assam kaba la jan dep artad.

Katei ka ktem Pulit jong ka sorkar Assam ka dei kaba la dep ban shna nadong shadong bad kaba sah kalong sa tang ban pyndep iaka tnum ïing.Kane ka ktem Pulit kadei kaba la shna bha da ka mawblock bad ka dewbilat.

Halor katei ka jingshna ia katei ka ktem pulit ka Assam ym don mano mano ba bna. Dei tad hadien ba u Border Magistrate bad ka kynhun Pulit ka West Jaintia Hills kila hiar sha katei ka shnong ban phah sangeh iaki pulit Assam ban shna ia katei ka ktem Pulit kaba hap hapoh u sam ka Jylla.

Bunsien ka sorkar Assam ka mang ban buh ktem pulit ha Mukroh bad kala ju pyndik iaki paidbah nongshong shnong kitei ki ar shnong haka por rep por riang bad kem ruh iaki kali kit dieng na katei ka thain, hynrei ha kane ka kynti kala shna ia katei ka ktem pulit sop sop haka jaka khlaw haka shnong Saba.