Buh jaka ka Sutnga, Rymbai Shkenshynriah, Khliehriat West bad ka Rymbai Iawpynsing haka semifinal Super Div ka EJHDFA

Syllad | The Rising MeghalayaDecember 7, 2023

Ka Sutnga SSCC, Rymbai Shkenshynriah SC, Khliehriat West YWSC bad Rymbai Iawpynsing SC kila buh jaka ialade haka semifinal haka Super Division Football Tournament kaba pyniaid da ka East Jaintia Hills District Football Association (EJHDFA).

Katba ka Moolamanoh SC bad ka Rymbai Wahshnong SC kila hap noh ban hiar sha ka First Division hadien ka jingbym lah ialehkai bha mynta ka aiom ialehkai.

Haka jingialehkai kaba khatduh jong ka kylla kaba nyngkong ha ki saw tylli ki madan ialehkai hapoh East Jaintia Hills District, ka resol ka long ba ka Rymbai Shkenshynriah, Thangskai Tiger, Rymbai Iawpynsing kila khur iaka namjop, katba ka jingiakhun ka Sutnga SSCC bad Khliehriat West kala kut noh da kaba iakhaid khlem don mano mano ba ioh pynkhih iaka jar.

Haka jingialehkai kaba long ha madan Wapungskur SSWO, ka Rymbai Shkenshynriah ka la jop da 1-0 iaka Dhana SC bad ia kane ka kol jong ka Rymbai Shkenshynriah la thep da u Hikaidame Bareh haka minit kaba 56.

Haka jingialehkai kaba la long ha madan Teilang Phawa Dkhiah West, ka Thangskai Tiger ka la pynliem da 2-1 iaka Rymbai Wahshnong SC. Ki ar kol ka Thangskai Tiger la thep da u Pynthymme Rymbai haka 44 bad u Sooki Syrti haka minit ba 90+2. Shikol ka Rymbai Wahshnong SC kala mih paw da ka owngoal.

Ha madan Chiehruphi hapdeng ka Sutnga SSCC bad Khliehriat West ka jingiakhun ka la kut da kaba iakhaid khlem don mano mano ba ioh pynkhih jar.

Haka jingialehkai ha Diengshynrum, Khliehriat, ka Rymbai Iawpynsing ka la jop da 2-1 iaka Molamanoh. Iaki kol jong ka Rymbai Iawpynsing la thep da u Hesmiki Rymbai haka minit kaba 24 & 59. Katba ka shikol jong ka Moolamanoh SC la thep da u Kiming Dkhar ha ka minit kaba 65.

Ka jingiakhun semifinal (qualifier) kaba nyngkong kanlong hapdeng ka Sutnga SSCC pyrshah iaka Rymbai Shkenshynriah. Ka bar Eliminator kan long hapdeng ka Khliehriat West pyrshah iaka Rymbai Iawpynsing. Ka resol kaba na kine ki jingialehkai kin iakhun iaka semifinal kaba lai (qualifier 2) hapdeng ka rem na ka seimfinal kaba nyngkong bad kaba jop na ak eliminator.