Buh jaka ka Sohlawiat bad ka Padu Utd haka semifinal Upper bad Lower Div football ka ASSA

Syllad | The Rising MeghalayaJanuary 16, 2025

Ka Sohlawiat SC naka kyrdan Upper Division bad Padu United naka Lower Division kila rung sha ka semifinal hadien ka jingkhur jingjop haka quarter final haka 16 tarik Kyllalyngkot.

Ia kine ki lympung ialehkai la pyniaid da ka Amlarem Sub Divisional Sports Association (ASSA) ha madan Mini Stadium Ladjaplem, Amlarem.

Haba phai shaka jingialehkai quarter final jong ka kyrdan Upper Division, ka Sohlawiat SC kala pynrem iaka Amlanai TC da 1-0. Ia kane ka kol jong ka Sohlawiat la thep da u Kynmo Surong (15).

Katba haka kyrdan Lower Division, ka Padu United kala jop pyrshah iaka Nongshilliang Pdengshakap da 3-1.

Iaki kol jong ka Padu United la thep da u Pynshkemlang Mukhim (19 & 40) bad Fourstar Pohshna (58), katba iaka kol jong ka Nongshilliang Pdengshakap la thep da u Dikyrmen Swer.

Haka 17 tarik Kyllalyngkot ka jingialehkai quarter final haka kyrdan Lower Division kan long hapdeng ka Everlasting Sohkha pyrshah iaka Padu Mawsku haka por 12.00 baje mynsngi, katba haka Upper Division kan long hapdeng ka Shnongpdeng SC pyrshah iaka Lamin XI haka por 2.00 baje nohphai sngi.