Buh jaka ka Mulait United FC bad ka Narwan SC haka semifinal super league ka Saipung Block SA

Syllad | The Rising MeghalayaNovember 12, 2021

Ka Mulait United FC bad ka Narwan SC kila lah ban buh jaka ialade haka kyrdan jong ka semifinal haka lympung ialehkai Super League ka Saipung Block Sports Association (SBSA).

Ka Mulait United FC bad ka Narwan SC kila wan haka kyrdan ba nyngkong bad ba ar haka miej iakhein point ka SBSA. Na ki 7 tylli ki jingiakhun ka Mulait FC kala kamai 17 point ba ka Narwan 15 point.

Ka Lakasein SC bad ka Jalaphet Bri Sumer Sc mar 9 point na ki 6 tylli ki jingiakhun kiba la dep, katba ka Tluh SC na ki 7 tylli ki jingiakhun kala kamai 8 point, ka kynhun ka Lamyrsiang na ki 6 jingiakhun kala khur point 8 bad ka Moochut Pyrdung 6 point na ki 6 sien iakhun.

Baroh 5 tylli kine ki kynhun ki hap ban iakhun tyngeh ban jop ha ki jingiakhun kiban sa wan ban rung sha ka Top 4 ne ka semifinal.

Haba phai sha ka jingiakhun kaba long haka sngi Palei, ka Jalaphet Bri Sumer SC kala jop 3-1 kol pyrshah iaka Pala SC.

Na kaliang ka Jalaphet la thep kol da u Rilang Malang, Kerlang Tlang bad u Ker Syrti. Iaka shi kol ka Pala la thep da u Ferman Lamurong.

Ha kawei pat ka jingiakhun ka Narwan SC kala jop iaka Jarain SC da 2-0 kol. Ia kine ki 2 kol la thep da u Dominic Sungoh bad Living Phawa.