Bthah u Myntri ia ki Labour Inspector ban talasi ia ki nongtrei bylla mynder ri

Syllad | The Rising MeghalayaMay 17, 2025

U Myntri ka Tnad Labour u Bah Shakliar Warjri u la bthah ia baroh ki Labour Inspector ba kin pynlong ia ki jingtalasi ha baroh ki jaka pyntrei ia ki jingtei ha kylleng ka jylla khnang ban tehlakam bad lapdien ia ka jingdon jong ki nongtrei mynder ri kiba wan rung beain.

Haba kren sha ki lad pathai khubor ha ka sngi Thohdieng u Bah Shakliar u la ong, “Dang ha kine ki khyndiat taiew ba ladep, nga la khot pynlong ia ka jingialang bad nga la bthah bad ai por ia baroh ki Labour Inspector ba kin pynlong ia ki jingleit jurip sha baroh ki jaka ba pyntrei ia ki jingtei bapher bapher ha man la ki block bad ki District. Ngi la shimkhia thikna ha kaba iadei bad kane ka phang,”

Ia kane u Myntri u la pynpaw haba jubab ia ka jingkylli halor ka jingioh bat ia kiba bun ki nongtrei bylla kiba wan rung beain ha ka por ba pynlong ia ki jingtalasi mynder da ki kynhun sengbhalang ha kylleng ka jylla.

Nalor kata haba pynpaw ba ka long kaba kongsan ia ki nongbylla mynder ba kin register ialade bad ka tnad, u Bah Shakliar u la ong, “Ngam don jingtip halor kane kaba phi kdew ia ka jingsyier ia ka jingwan rung kyrthep ki mynder. Kam pat poi sha ka jingtip ka jong nga, hynrei lada ka don kaba kum kata ngin sa khmih bniah ia kane.”

Ha kaba iadei bad ka jingpulom jong ki kontraktor ban register ia kine ki nongtrei bylla kiba ki pyntrei ia ki jingtei ha kylleng ki jaka, u Myntri u la ong, “Shisien ba la ai kam kontrak ia uno uno u briew shwa ban aiti ia ki work order kaba khatduh u dei ban register ia baroh ki nongtrei bylla. Ka dei ka bynta kaba kongsan ka hap ban pyndep.”