Bthah u Myntri ia ka Tnad C&RD ban khmih ban pyntreikam ia ka Minimum Wage ha ka Jylla

U Myntri ka Tnad Community & Rural Development u Abu Taher Mondal haka sngi Nyngkong u la bthah ia ka Tnad ba kan khmih ia ki C&RD block ha ka jylla ki la pyntreikam pura ne em ia ka minimum wage.
Kane ka jingbthah jong u Myntri ka la wan long ruh hadien ba kane ka Tnad ka la hap ban pynsangeh noh ia ka jingplie paidbah ia ka ophis jong ka Mawpat C&RD Block namar ka jingpyrshah jong ka Dorbar Shnong halor ka nongrim ba ka sorkar kam shym la burom ia ka soskular ba la iasoi ha ka por ba la aiti ia ka jaka kaba 3 akar na ka bynta ban tei ia ka ophis jong ka block.
Haba kren sha ki nongthoh khubor haka sngi Nyngkong, u Myntri u al ong, “Ngi la dep ban pynlong ia ka audit. Mynta ka sngi ngi la bthah biang ia ka Tnad ba kan beit biang la kiba kum kine ki kam ki dang don ne em kiba sahteng ha kiwei pat ki block ha kaba iadei bad ka mininum wage. Ngin sa khot ia ka jingialang bad kiwei pat ki Tnad ban iakren halor kane ka kam.”
U Mondal u la ong, “Nga la pyntip sha ki (Dorbar Shnong Mawpat) ba kano kano ka jingiasoi soskular ba la iasoi ha ka por ba aiti ia ka jaka yn pynurlong katkum ka lynti kumba ka dei ban long.”

Haba kylli, u Mondal u la ong, “Kam dei ban ai ia baroh ki kam. Ki don ki kyndon bad ka iapher na kawei ka block sha kawei pat namar ki don ki jaka kiba kham heh ban ia kiwei pat bad ki don kiba kham rit. U la pyntip ruh ba la dep ban thungkam ia san ngut ki briew napoh ka shnong hapoh Mawpat block, bad ia kane ka jingthungkam la leh ruh ha kiwei kiwei pat ki block kumjuh.
U la ong ruh ba ka jingdawa jong ka Dorbar Shnong ha kaba iadei bad ka minimum wage na ka bynta ki nongtrei casual ka dei kaba shong nongrim katkum ka hok. U la kyntu ruh ia ki ba kin wan ban iakynduh bad iakren halor kino kino ki mat, hynrei ban buh tarik na ka bynta ban iakynduh.
Halor ka jingkylli lano yn plie ia ka Mawpat block, u Mondal u la ong ba ki lah ban leh ia kane tad hadien ba la pyndep ia baroh ki jingdonkam namar kim kwah ban iaid lait ia ka jingsngew jong ki paidbah nongshong shnong. Ki don ki kynhun ki ban wan iakynduh ia nga lashai ka sngi. To ngin ia peit kaei ruh kaei ka jingthmu ka jong ki.
U la ong ruh ba ia mynta hi kam pat don satia kano kano ka jingtyrwa ban pynkha block thymmai, hynrei ka sorkar ka dang bteng ban ioh pdiang ia ki jingtyrwa. Ka dei ka kam kaba iai bteng bad na ka liang ka sorkar ruh ka dang shon bishar bniah na ka por sha ka por.
Shuh shuh u la pyntip ba haduh mynta ka sorkar ka la pynkha haduh 56 tylli ki block, ha kaba 9 tylli la pynkha tang ha ka samoi treikam jong u snem ba la dep, kata nalor ka Mawhati block kaba la pynkha bad plie ha kane ka samoi treikam kaba mynta da u Myntri Rangbah ka jylla u Conrad K Sangma ha ka 25 tarik u Kyllalyngkot mynta u snem.

Leave a Reply