Bthah u DC East Jaintia Hills ban ker iaki krem dewiong ba hap & khlad ki mynsiem briew

Syllad | The Rising MeghalayaJuly 6, 2020

U Deputy Commissioner, East Jaintia Hills District ula pynbna paidbah ba hadien ba la pyrkhat sani bha, bishar bniah naka jingduh ei shibun ki mynsiem briew, jingmynsaw jong ki briew bad ruh ka jingiap ki mrad bad ki jingri jingdup kum ki masi, ki blang na ka jing hap ha ki thliew ba tih dewiong kiba la shu ieh shrah ne kiba dang don dewiong la bthah ia baroh ki trai par dewiong ban ker ia kine ki krem ban lait na ki jingjia ba sngewsih.

Katkum ka jingshem da ka NGT Committee ba kine ki thliew dewiong ki long ki ba don jingma ha baroh ki liang lada khlem phikir da ki bor shnong bad kumjuh ruh na ka liang ki Malik dewiong ban ker iaki krem bala ieh shrah ne ki jaka tuh dewiong.

Ha ka ba iadei bad kane, la kyrpad bad bthah ia baroh ki waheh shnong ba katkum ka order na u Chairman ka NGT Committee, u Justice BD Aggarwal u la bthah ba dei ban ker sawdong daki jingker ia kine ki thliew dewiong ba la iehshrah bad ba dang don dewiong lane da kaba pyndap noh iaki bym donkam shuh da ka khyndew ban lait na ka jingma kaba ap ia baroh.

Shuh shuh ia kane ka jingker sawdong iaki jaka tih dewiong ne thliew ba tih dewiong ka shnong kadei ban pan ka jinglut na ki trai par, ki malik dewiong ba pyntrei iaka par dewiong ne da ka pisa shnong namar ba kadei ban shim iaki lad jing iada ia ki nongshong shnong, ki trai shnong, ki khun ki kti, ki khynnah khyllung, ki jingri jingdup kiba hap iaid lynti man la ka sngi sha kitei ki jaka ba don kine ki thliew dewiong.

U Deputy Commissioner u la bthah ia baroh ki waheh shnong ba ki dei ban pynpoi ka report sha Office treikam jong u hapoh ka 20 sngi khnang ba ka Office ka lah ban pynpoi ia ka report ryngkat bad ka kyrteng ki shnong sha ka NGT Committee kiba la leh ia ka kam kumba la bthah haneng.