Bthah ka Sorkar ia u CS ban bishar ia ka kaiphod ka Expert Committee halor ka Reservation Policy

Syllad | The Rising MeghalayaJune 14, 2025

Ka Sorkar jylla ka la bthah ia u Chief Secretary ka Jylla, u Bah DP Wahlang ba un bishar bniah ia ka kaiphod ba la aiti da ka Expert Committee halor ka jingpynkylla thymmai ia ka State Reservation Policy.

Haba pyntip ia kane haka sngi Thohdieng, u Nongaiktien ka Sorkar uba dei ruh u Myntri u Bah Paul Lyngdoh u la ong ba ka Expert Committee ka la dep ban aiti ia ka kaiphod sha ka Sorkar Jylla.

“Kumta mynta ka dei ka kamram jong ka sorkar ba kan bishar bniah ia ka kaiphod. Kumta ruh ngi la aibor ia u Chief Secretary ka Jylla lem bad ki heh ophisar ba kin khmih bniah ia ka kaiphod,” u la bynrap.

Haba pynpaw ba ka kaiphod ka dei kaba bun bad kaba rben bha, u Bah Paul u la ong ba ia ka jingkynthoh lyngkot ha kaba iadei bad ka kaiphod la wanrah hapoh ka jingialang jong ka Kynhun Myntri.

“Ia ka kaiphod kaba pura yn sa wanrah ha ka miej iakren hapoh ka Iingdorbar Thaw ain ka Jylla ka ban sa long ha u bnai Nailur 2025,” u la pyntip shuh shuh.

Ka Expert Committee ba la khlieh da u Justice (Retired) Mool Chand Garg, ka dei kaba la thung da ka Sorkar jylla ha ka 12 tarik u Nailur 2023 na ka bynta ban bishar biang ia ka Reservation Policy ka Jylla hadien ka jingdawa ban pynkylla na kiba bun balang.