Bthah ka Sorkar ia ki skul bym pat ioh jingithuh ban register ha ka RTE Act ne shah khang khyrdep

Syllad | The Rising MeghalayaJuly 18, 2025

U Director of School Education & Literacy ka Jylla, u Bah Banteilang J Kharshandi haka sngi Thohdieng u la pynmih ia ka jingpynbna paidbah kaba la bthah ia baroh ki skul ki bym pat ioh jingithuh ba ki dei ban aplai noh mardor ban ioh ia ka jingithuh hapoh ka Right of Children to Free and Compulsory Education (RTE) Act, 2009.

U Director u la ong ba ki skul kiba treikam khlem ka jingioh jingithuh ki dei ban phah ia ki aplikeshon jong ki ha ka Form 1 sha ki District School Education Officers (DSEO) hapoh ka hynriew bnai.

Ki skul ki dei ban ioh ia ka jingithuh na ki bor ba dei khmih hapoh ka por ba la buh khnang ba kin lah ban bteng ia ka jingtreikam ka jong ki.

Nalor kata u Director u la maham ruh ba kito ki bym pyndep ia kane hapoh ka hynriew bnai kin ngat ha ka jingshah khang khyrdep jong ki skul, bad yn ym shah shuh ia ki ba kin dang bteng ia ki jingtreikam.

Ka jingpynbna ka la mana ruh ba yn ym shah shuh ban plie ia ki skul kiba thymmai khlem da ioh shwa ia ka jingithuh na ka Sorkar.

Kumjuh la bthah ruh ia ki bor pyniaid jong kine ki skul ba kin leit mih mardor sha ka ophis jong ki DSEO ban sdang ia ka kam kaba dei ban pyndep na ka bynta ban ioh ia ka jingithuh.