Bthah ka Sorkar ia ki DC ban khynra bad kem ia ki nong Bangladesh bad Rohingya

Syllad | The Rising MeghalayaMay 21, 2025

Ka sorkar Jylla ka la bthah ia baroh ki bor District ba kin khynra bad kem ki nong Bangladesh bad ia ki jaidbynriew Rohingya kiba wan buhai shnong beain ha kane ka jylla.

Kane ka jingbthah ka la wan long hadien ba ka Ministry of Home Affairs (MHA) ka la bthah ia baroh ki sorkar jylla bad ki union territory ba kin thaw ia ki Special Task Force (STF) ha man la ki District khnang ban ithuh bad ban pynher krad ia ki nong Bangladesh bad ki Rohingya kiba wan buhai shnong beain hapoh kine ki 30 sngi ki ban wan.

Haba kren sha ki lad pathai khubor haka sngi ba Ar, u Symbud Myntri Rangbah uba khmih ia ka Tnad Pohiing, u Bah Prestone Tynsong u la ong, “Hooid ngi la don ha ka kam bad ngi la dep ban bthah ia baroh ki Deputy Commissioner ba kin khynra ia kino kino ki jaka ba ki suba ne ioh jingtip halor ka jingdon jong ki nongbuhai shnong kiba wan rung beain bad dei ban kem ia ki mardor.”

U Bah Prestone u pyntip ruh ba ki District Task Force (DTF) kiba la shah bynshet ha kane ka kam ba kin peitngor ia ki briew kiba wan rung sha ka jylla bad kiba sah ha ki District bapher bapher kumba la kdew hapoh ki kyndon jong ka Meghalaya Residents Safety and Security Act (MRSSA), 2016.

“Ha kaba iadei bad ki mynder ri kiba wan rung beain, ngi la dep ban bthah ia baroh ki Deputy Commissioner ba kin shim ia ki lad jingpynshitom bad ban buh ia kane kum ka kam kaba hakhmat eh. Ngi la bud ryntih bad pyntreikam pura ia ki kyndon jong ka Foreigners’ Act” u la ong.