Bthah ka Sorkar ia ki BDO ban shimkhia halor ka jingpyniasoh Aadhaar ia ki Job Card

Syllad | The Rising MeghalayaApril 23, 2025

U Myntri ka Tnad Community & Rural Development (C&RD), u Abu Taher Mondal ha ka 22 tarik Iaiong u la ong ba ka la don ka jingkiew ha kaba iadei bad ka jingpyniasoh ia ki Job Card bad u Aadhaar na ka bynta ka jingpyniaid beit ha ka jingpyntreikam ia ka skhim Mahatma Gandhi National Rural Employment Guarantee Scheme (MGNREGS) ha ka Jylla.

 “Ngi la kham kiew mynta haba ia nujor bad ka snem ba la dep. Watla katta ngin dang kynjoh sha ka 100 percent ka jingpyniasoh ia ki Job Card bad u Aadhaar,” ong u Myntri haba kren sha ki lad pathai khubor.

“Kumta ruh ngi la bthah ia ki Block Development Officer (BDO) ba kin khmih bniah ba baroh kiba ioh jingmyntoi na ka skhim NREGS ki dei ban pynrung kyrteng Aadhaar bad ruh ban pyniasoh ia u Aadhaar bad ka Job Card,” u la ong.

Nalor kata u Myntri u pyntip ruh ba ym shym la lah ban pyllait ia ka song pisa ha ki por ba la dep namar ka jingpulom ban pyniasoh ia ki Job Card bad u Aadhaar.

“Ngi iakynduh ia shibun ki jingeh. Kumta ngi la iakren bad u Myntri Rangbah ka Jylla uba la thoh sha ka Sorkar India ban pyllait noh ia ngi. Ka Sorkar India ka la mynjur ban pyllait ia ngi haduh ar snem ryngkat ka jingbuh por ba hadien kane kan ym don shuh kano kano ka jingailad,” u la bynrap.

Nalor kata u la ong ruh ba ki don katto katne ki bill ia kiba ym shym la lah ban shna bad pyllait namar ki don ki kyrteng jong ki briew ki bym pat pyniasoh bad u Aadhaar.