Bthah ka sorkar ia ki 3 ADC ban pyntreikam noh da ki kor digital ban buh rekod ia ki jaka puta

Syllad | The Rising MeghalayaNovember 3, 2023

U Symbud Myntri Rangbah u Bah Prestone Tynsong u ba khmih ruh ia ka tnat District Council Affairs (DCA) haka Thohdieng u la khot pynlong ia ka jingialang jong baroh lai tylli ki Autonomous District Council ban iakren halor ka jingpyndonkam noh da ki kor digital na ka bynta ban buh jingthoh ha kaba iadei bad ki jaka puta (land records) ha la ki jong ki jaka.

Haba kren sha ki lad pathai khubor, u Tynsong u la ong, “Ngi la dep lypa ban shim ia ka rai ba hadien ba la mih ka jingpynbna, baroh ki laitylli ki ADC mardor ki dei ban pyntreikam noh ia kane ka digital na ka bynta ban buh rekod ia ki jaka puta katkum kane ka juk.

U pyntip ruh ba ka sorkar India lyngba ka Tnat Land Resources ka long kaba kloi ban bei tyngka na ka bynta kane ka projek kaba kongsan ban pynthikna halor ka jingpynkylla digital ia ki jingthoh kiba iadei bad ki jaka puta jong kawei pa kawei ka jylla hapoh ka ri.

Nalor kata u Bah Prestone u pyntip ruh ba na ka liang ka Sorkar kan sa thaw da ka Project Management Unit (PMU) ia kaba yn  khlieh da ki heh ka tnat District Council Affairs (DCA) nalor ki dkhot na ka tnat Revenue Department kumjuh da ki Deputy Commissioner bad ki District Council.

Shuh shuh u la ong ruh ba ka jingpynkylla digital na ka bynta ban buh jingthoh kan pynduna ruh ha kaba idei bad ki kam iakajia jaka.

Haba kylli halor ki jaka kiba don ha khappud bad ka Assam, u Myntri u la ong ba kane ka jingpynkylla digital ka mut kan kynthup ia baroh, bad ia mynta ngin leh na ka bynta ki laitylli ki district council kiba hap hapoh ka Sixth Schedule bad kiwei pat kin sa bud hadien.