Bthah ka NHRC ban shim iaki sienjam kiba biang iaka jingjia shah pyniap ha khappud

Syllad | The Rising MeghalayaFebruary 2, 2024

Ka National Human Rights Commission (NHRC) ha kane ka sngi Palei ba lah dep ka lah bthah ïa ka tnad kam poh ïing ka sorkar pdeng ban shim ki sienjam ba donkam halor ka jingjia sha pynïap u Sylvanus Dhar ha ki nongwan rungtuh na Bangladesh.

Kane ka jingbthah na ka liang ka NHRC ka lah urlong hadien ka jingujor jong i muktiar  Kynjaimon Amse na East Jaintia Hills District ha ka 22 tarik u Kyllalyngkot mynta u snem.

Hadien ka jingkhmihbniah ïa ka jingujor ba lah ai da i Amse, ka NHRC ka la shim ha kane ka sngi Palei ba lah dep ban bthah ïa ka tnad kam poh ïing ka sorkar pdeng ban shim ki sienjam ba donkam hapoh ka phra taïew.

Ka  NHRC ka lah bthah ruh ïa kane ka tnad ban shimkhia ki sienjam pyntreikam katkum ka jingujor ba lah ai.

Lah ban pynkynmaw ba  ka dei ha ka 6 tarik u Kyllalyngkot mynta u snem ha ka shnong Balisar, Lumsoskie kaba don ha Umkiang, East Jaintia Hills District  ba ki don kumba  15-16 ngut ki nong Bangladesh kiba wan ban rungtuh sha u pud u sam kane ka ri India hapdeng ka jingthmu ban wantuh kwai. La kynnoh ba kine ki kynhun runar kila kerkut bad thombor ia u Sylvanus haduh ban da iap bad u wei pat u paralok ula lait na ka tyrsim jong ka jingiap ha kane ka jingjia.

Shah kerkut bad da wait pom ki runar Bangladesh ia u Chiang Dhar ong u Rahul u lanot ba lait na ka tyrsim ka jingiap