Bthah ka MSPB ia ka NHIDCL ban pyndep noh kham kloi ia ka surok Umshyrpi-7 Mer

Syllad | The Rising MeghalayaAugust 19, 2025

Ka Meghalaya State Planning Board (MSPB) ka la bthah ia ka National Highways and Infrastructure Development Corporation Limited (NHIDCL) bad ia ki kontraktor ba kin pyndep noh kham kloi ia ka surok 4-lane na Umshyrpi sha 7 Mer Upper Shillong, kaba dei ka bynta jong ka project surok na Shillong sha Dawki.

La bthah ia kane haka 19 tarik Nailar hadien ka jingleit jurip da u Chairman ka MSPB u Bah Metbah Lyngdoh ha ka jingsynran lang da ki kdhot jong ka Board nalor ki ophisar ka Tnad PWD bad NHIDCL.

Haba kren sha ki lad pathai khubor hadien ka jingjurip, u Bah Metbah u la pynpaw ka jingsngewkhia halor ka jingiaid suki ha ka jingpyntrei ia kane ka project, da kaba kdew halor ki jingeh kaba ki nongleit nongwan ki iakynduh khamtam kito kiba dei na ka thain West Khasi Hills, South West Khasi Hills, Eastern West Khasi Hills bad ki bynta ka East Khasi Hills.

“Ki paidbah ki la mad jingeh shibun haba leit ba wan na ka thain 7 Mer Upper Shillong sha Anjalee petrol pump namar ka shim por haduh 1-2 kynta ban poi. Ngi sngew ba ka dei ka kam kaba sngewkhia shibun ba ki paidbah ki hap ban pynlut shibun ka por ban iaid lyngba kane ka surok khamtam ha ki por ba donkam kyrkieh,” u la ong da kaba bynrap, “Nga ruh nga iaid lyngba kane ka surok man ka sngi ban leit sha Mairang, bad nga iakynduh ia kajuh ka jingeh ban poi sha ka jaka kaba nga thmu ban leit.

Halor ka jingpynslem ban pyndep ia ka bypass ha 3 Mer Upper Shillong, u pyntip ba ha kane ka jingjurip la lap ba ki kontraktor ki iakynduh jingeh, kata kynthup ha kaba iadei bad ka jingpynkynriah ia ki pipe um ka ban shim por sa kumba ar bnai ban dep.

“Na ka liang ki kontraktor ki la kular ba kin pyndep noh ia ka bypass hapoh ki ar bnai ban wan bad ban pyllait noh ia ka leit ka wan jong ki kali,” ong u Bah Metbah uba la bynrap ba ka rukom pyntrei ia ki katto katne ki kynroh kim long satia kiba i hun bad skhem khamtam ka kynroh hajan ka jingkieng Umshyrpi. U la ong ba ki heh ka PWD ki la iakren ia kane ka bynta bad ki kontraktor kumjuh bad ka NHIDCL.

Ia kane ka project la buh por ban pyndep ha u bnai Nohprah 2025. Ka MSPB ka la bthah ia ka NHIDCL ba kan ai ia ka por ban pyndep ia ka kam da kaba ban jur halor ka jingdonkam ban pyndep ha ka por ba la buh khnang ban lah ban weng ia ki jingeh kaba ki nongleit nongwan ki iakynduh man ka sngi.