Bthah ka iingkashari ban leit jurip markhmat ia ki weighbridge kiba don ha ka Jylla

Syllad | The Rising MeghalayaDecember 6, 2024

Ka ïingkashari Meghalaya High Court ha ka 5 tarik Nohprah ka la hukum ban pynlong da ka jingleit jurip kaba markhmat ia kawei pa kawei na ki 28 tylli ki weighbridge hadien ka jingujor PIL kaba la kynnoh ia ka jingbym leh ei ei bad ka jingpyniaid bakla jong ka Sorkar ban pyntreikam ia ki.

Haba pynmih ia ka hukum ba shi por halor kane ka kam, ka kynhun ki nongbishar kaba kynthup ia u Chief Justice IP Mukerji bad u Justice W Diengdoh ka la ong, ” (i)Yn pynlong ia ka jingleit jurip ba markhmat kaba ar kynta da ki nongshah mudui ha ka jingiadonlang lang u nongmudui ne u nongmihkhmat jong u ha kawei pa kawei ka weighbridge ha ka jaka talasi ha ka shi sngi ha ka por ba jur bha ka jingdheng kali. Kaba kum kane ka jingjurip bniah kan long ha kaba rieh, kata kaba khlem da pynbna paidbah. Ngi pynshai tang ia u nongmudui u dei ban pyntip ia ki nongpeit bniah ba buhrieh. U nongmudui um dei ban pynlong ia kano kano ka jingjurip hynrei un u ia don lang. (ii) Ia kino kino ki jinglum pisa na ki jingkit palat pud, ki jingsiew, ki jingmih bad kiwei pat ia kiba la ioh lyngba kane ka jingjurip bniah dei ban pynpaw ha ka kaiphod ka ban sa aiti sha ka iingkashari. Nalor kata ia ka kaiphod yn soi da u Commissioner ka tnad Transport.Halor kane ka kaiphod, ka iingkashari kan sa rai ia kino kino ki sienjam kiba dei ban shim. (iii) Ia kane ka PIL yn shong bishar biang 10 tarik u Rymphang 2025.”

Ka hukum ka ong ba ia ka jingphaikhmat jong ka iingkashari la khot ruh da u nongiasaid ain jong u nongmudui (Tennydard M Marak) halor ka kaiphod jong u Comptroller and Auditor General of India (Revenue Sector) na ka bynta u snem ba la kut noh ha ka 31 tarik Lber 2022, ha kaba ka jingbym lah ban pynurlong ia ka khajna namar ka jingbym treikam ne hapoh ka jingtreikam jong ki weighbridge la antad ba ka jingduh nong kan kot sha kumba T.23.75 klur.

Kane ka khajna nalor kiwei pat, ka kynthup ia ka bai kit palat pud, ka cess bad ka “royalty” ha kaba iadei bad ki mar ba shalan shabar ri, ka kuna, ka bai wai, ka bai wai bad kiwei kiwei. Ki kaiphod kiba kum kine na ka bynta ki snem ba la dep naduh u snem 2012 la buh ruh ha khmat ka iingkashari kiba pyni ia ka jingduhnong ha ka khajna.