Bthah ka iingbishar ia ka Sorkar ban thaw ia ka Accountability Commission hapoh ka Police Act 2010

Syllad | The Rising MeghalayaAugust 19, 2025

Ka iingbishar Meghalaya High Court ka la bthah ia ka sorkar Jylla ba kan thaw ia ka Accountability Commission hapoh jong ka Meghalaya Police Act, 2010 hapoh ka saw bnai, ha kaba ka kamram jong ka, ka long ban tohkit halor ki jingkynnoh leh bakla jong ki pulit bad ban pynthikna ia ka jingkitkhlieh.

Ia kane ka jingbthah la pynmih hadien ka jingbishar ia ka Public Interest Litigation (PIL) ba la mudui da u Nilberth Ch Marak bad u Flaming B Marak kiba la kdew halor ka jingpulom jong ka sorkar ban thaw ia ka Accountability Commission watla la dep ban pynlong ain ia ka Meghalaya Police Act, 2010.

“Kumta ngi la bthah ia ka sorkar Jylla ba kan thaw ia ka Commission hapoh ki kyndon jong ka Meghalaya Police Act, 2010 hapoh ka saw bnai naduh kane ka sngi,” ong ka Division Bench kaba kynthup ia u Chief Justice IP Mukerji bad u Justice W Diengdoh ha ka hukum ba la pynmih ha ka 18 tarik Nailar.

Ka Bench ka shim ruh ba ka kamram jong ka Accountability Commission ka long kaba iar bad kaba ai ia ki jingbthah, kaba ai ia ka jingbtin lynti bad aijingmut ia ki kam kiba ka sorkar bad ka tnad pulit ki dei ban leh.

Ka Commission ka don ia ka bor ban tohkit ia ki rekod ba iadei bad ki jingtohkit, ban bthah ban pynkloi ia ki jingtohkit bad ban aijingmut halor ka rukom shong bishar jong ka tnad. Ka jingthaw ia ka Commission bad ka jingjied ia ki dkhot ka dei kaba la kdew ha ka kyndon 74 jong ka Meghalaya Police Act, 2010.

Ka Bench ka la kdew ruh halor ka jingpynsngew jong u ND Chullai, Additional Advocate General ba ki don ruh kiwei ki ain kiba la treikam bad kiba aibor ia ka jingtreikam jong ka Commission katkum kane ka Act, bad dei na kata ka daw ba ia kane ka Act ym shym la pyntreikam shuh.

“Lada ka long ha kata ka dur, ka sorkar Jylla ka long laitluid ban pynkylla ne pynduh ia ka Meghalaya Police Act, 2010. Kat bym pat leh ei ei ia kane, ia ki jingbthah ha ka hukum jong ngi dei ban pyntreikam beit,” ka la ong haba pynkut ia ka PIL.