Bthah ka iingbishar HC ban ym pynpoi ia u dewiong ba tih beain sha ki karkhana

Syllad | The Rising MeghalayaOctober 5, 2023

Ka iingbishar High Court ka Meghalaya hynnin ka sngi Balang ka la hukum ba ym bit satia ban pyniaid ia u dewiong ba la tih beaiñ shapoh ki karkhana dewbilat ne ki karkhana coke kiba don hapoh ka Jylla.

Ka iingbishar ka la pynmih ia kane ka hukum hadien ka  jingshong bishar da baroh ki nongbishar ba la khlieh da u Chief Justice u Sanjib Banerjee halor ka jingujor PIL ha kaba iadei bad kane ka bynta.

Nalor ka kaiphot ba la ai da ka Jylla, na ka liang u Advocate General ula pyntip ba ka Jylla ka la ioh ia ki jingtip kiba bniah bad don ruh ki jingtip kiba dang ap ha kaba iadei bad ka jingdon jong u dewiong ba la pyndonkam da ki karkhana ne ferro alloy, dewbilat bad ki coke.

Shuh shuh u Advocate General  ula pyntip ruh ba haba shimkhia ia ki jingshem jong u Justice Katakey ba la kdew ha kawei na ki kaiphot ba ula ai, na ka liang ka sorkar ka la pan da ka jingpynshai na ki katto katne ki karkhana dewbilat hapoh ka Jylla.

Ha kajuh ka ppor ka iingbishar ka la buh ban shong bishar biang ia kane ka mukotduma hadien hynriew taiew haba bthah ruh ba u Justice Katakey u dei ban ioh noh ia ka jingsiew adhoc ba T. 4 lak nalor kiwei kiwei ki jingpynlut halor ki kam ba u la leh katkum ki jingbthah ba la ai kham mynshuwa.

Ha kajuh ka por, ka iingbishar ka la bthah ruh ia ka Sorkar ba kan khmih ha kaba iadei bad ki jingkynnoh kaba mih pyrshah ia ka Jai Maa Coal Private Limited bad ki kynhun ne briew ba khmih ia ka, kaba la shah ujor lyngba ka PIL.