Bthah ka bor pyniaid sub division Mairang iaki kali kamai bad dukan ban bud ryngkhi iaki kyndon COVID-19
U Additional Deputy Commissioner i/c ka Mairang Civil Sub-Division, Mairang, u Bah A. Nongbri, u la bthah ba baroh ki draibar kali kamai bad ki nongshong die dukan ha baroh kawei ka Mairang Sub Division ban bud ryngkhi iaki kyndon ban iada na ka khlam COVID-19.
Katkum ka jingbthah u ADC la bthah ia baroh ki nongniah kali kamai ba kidei ban leit ai ia ka injek kum shi bynta ba iada na u khniang jingpang COVID-19. La banjur ruh ba ki draibar ki dei ruh ban deng beit thik ia ki mask haba don briew ne passenger ha ki kali kamai jong ki.
La bthah ruh ia ki draibar sumo, taksi bad auto rickshaw ba kin pynbiang ia ki sanitizer, ban pynkhuid ia ki kali kamai jongki man ka sngi bad kim dei ban shah iaki passenger bym deng mask ban shong ha ki kali kamai jongki. Ki dei ruh ban buh iaki kynja pla khnang ba ki briew kin ioh bret ia ki niut bad ym dei ban shah ia ki nongshongkali ban bret niut mata madei ha surok ne lynti syngkien.
Halor ka rukom thepbriew, la bthah iaki draibar ba kin thep passenger katkum ka jingbthah ka tnat Transport, kata, ki Local Taxi (Maruti 800) ki dei ban thep saw ngut ki passenger, laingut hadien bad iwei hakhmat bad kumta ter ter ia kiwci pat ki kali.
La mana ruh iaki draibar bad nongshong kali ban biah pathar bad ban dih duma ne sikret hapoh kali bad kiba pynkhein ia kitei ki kyndon kin shah dain kuna katkum ka ain bad ia ki laisen jong ki draibar kiba pynkhein ia kane ka jingbthah yn shim noh, bynrap shuhshuh u Additional Deputy Commissioner.
Ha kajuh ka por u ADC ula bthah ruh ia baroh ki nongshong dukan ha ka thain Mariang naki kidei ban leit ai ia ka injek kum shi bynta ban iada na u khniang jingpang COVID-19 bad ki nongshongdukan ki dei ruh ban deng beit thik ia ki mask haba don ki nongthied jingthied ha ki dukan ki jongki.
La bthah ruh ia ki trai dukan ba ba kin pynbiang ia ki sanitizer, ban pynkhuid ia ki dukan jongki man ka por bad kim dei ban shah ia ki nongthied jingthied bym deng mask ban rung ha ki dukan jongki. Kim dei ruh ban bret pathar iaki niut bad ki dei ban buh ia ki borti bret niut ba biang khnang ba ki nongthied jingthied kin ioh bret ia ki niut bad kim dei ban shah ban iarung khapngiah briew hapoh dukan.
Ki dukan sha bad dukan bam, kim dei ban shah iaki briew ban shongkai hapoh dukan, bad ki nongbam ruh, mar iadep bam ki dei ban mih noh napoh dukan. Shuhshuh, katba lah, ki trai dukan sha bad ja ki dei ban pyndonkam ia ki sla bad pela kot ban ai ja ne sha ia ki nongbam bad kim dei ban pyndonkam ia ki pliang ne pela plastic.
La mana ruh ia ka jingbiah pathar bad jingdih duma ne sikret ha ki dukan bad kiba pynkhein ia kitei ki kyndon kin shah dain kuna katkum ka ain bad ia ki dukan kiba pynkhein ia kane ka jingbthah yn khang khyrdep noh mardor, bynrap shuhshuh u Additional Deputy Commissioner.
Facebook
Instagram
Youtube
Twitter
Leave a Reply