Bteng ki shipai BSF Muktapur ban pynthut ia ki paidbah nongleit nongwan

Syllad | The Rising MeghalayaAugust 12, 2023

Na ka liang ki shipai Border Security Force (BSF) Muktapur ki dang iai bteng ban pynthut bad pyndik ia ki paidbah nongleit nongwan khamtam kiba kit ia ki mar bam mar dih ha kaba ki ju kyndang bad pynhiar ia ki mar ki mata bad kim ju thep ne kyntiew biang ia ki haba ki la dep ban talasi wat hapdeng jong u slap.

Ha kaba iadei bad kum kine ki jingjia na ka liang u Bah Benediction Buam uba don ia ka Wine Store ha Muktapur u la iathuh ba ha ka 11 tarik mynta u bnai ha ka por kumba 4:50 pm ki BSF ki la bat ia ki kali kaba kit ia ki mar jong ka ‘Buam Wine Store,’ Muktapur bad kim shym la pyllait shuh wat hadien ba la dep ban talasi ne checking.

U la kynnoh ruh ba kine ki BSF ki la ong pynban ba ka dei duplicate permit (permit thok). Hadien kane u la ong ba u la leit ban ujor da ka FIR sha ki pulit bad ynda la poi ha thanad la phone sha u Company Commander BSF, 4th BN BSF, BOP Muktapur da u Incharge Muktapur Police Outpost bad phah wan ia u ban pyllait noh ia ka kali bad permit. Kumta kine ki BSF ki la pyllait noh ia ka kali bad ia ka permit jong u haduh ka por 5:50 janmiet.

Na ka liang u Bah Buam u la ong ruh ba kane ka dei ka sien kaba lai tang hapoh ka shibnai ba ki BSF ki la leh ia kum kine ki kam pyni bor pyrshah ia ki kali kit mar jong u da kaba ong ba u rah da ka permit thok wat haba la dep soi da u Superintendent jong ka tnad Excise. Hynrei u la ong ba ha kitei ki ar-sien la pyllait noh hadien ba ma u lem bad ki katto katne ki la ia pynphai ktien markylliang. 

Hynrei, u la ong ba ha kane ka jingjia kaba dang shen ki BSF kim kwah ban pyllait shuh ia u tad haduh ba u la hap ban leit shapoh thanad.

Shuh shuh u Bah Buam u la ong ruh ba ym dei satia baroh ki BSF kiba leh ia kane ka kam pyni bor hynrei u don tang uwei uba kyrteng u Girendra Chaturvedi uba la kren baheh bad kren bein ia ki riew paidbah.