Bteng ki Pulit Ri Bhoi ban hikai ia ki rukom niah kali ban kiar na ki jingjia aksiden

Syllad | The Rising MeghalayaApril 30, 2025

Ki pulit ka Ri Bhoi District haka sngi Balang ki la bteng ban pynlong ia ka jingai jinghikai ha kaba iadei bad ki rukom niah kali kaba katkum ki kyndon ain niah kali khnang ban iada na ki jingjia aksiden.

Kane ka jingai jinghikai ka long khamtam na ka bynta ki nongñiah ia ki kali kum ki trok bad kiwei kiwei ia kaba la pynlong ha pyrshah ka ophis Sericulture ha Mawdiangum.

Ha kane ka jingai jinghikai ba la lamkhmat da ki heh pulit na Nongpoh Police Traffic Branch la aijinghikai ha kaba iadei bad ka jingdonkam ban bud ryntih ia ka rukom iaid ki kali ha u surok bah National Highway (Lane Driving), ka jingniah kali ban burom lem ia kiwei pat kiba iaid ha u surok bah, ban ym pynher sted (Speed Limit) bad kiwei kiwei khnang ban iada na ki jingjia aksiden.

Lah ban kdew ba ki jingjia aksiden kiba shyrkhei ki la bteng ban iai jia ha ka surok bah National Highway khamtam ha ka surok National Highway 06, Shillong Bypass bad kiwei kiwei ki surok bah kiba la shim ruh ia ki jingim briew ba kordor.

Na ka liang ka tnad pulit ka Ri Bhoi District ha ka jinglamkhmat da u Superintendent of Police, u VS Rathore ka la bteng ban mih sha surok ban sneng bad ban hikai ia ki nongñiah kali ban bud ryntih ia ki kyndon ain jong ka Motor Vehicle Act bad kito kiba pynkheiñ ain kin ngat ha ki jingpynshitom bad shah daiñ kuna.