Bteng khur namjop ka Ummulong CC pynliem iaka Young Lad’s da 6 wicket haka District Cricket League ka WJHDCA

Syllad | The Rising MeghalayaMay 3, 2025

Ka Ummulong Cricket Club kala iai bteng ha kaban khur namjop haka jingialehkai District Cricket League kaba pyniaid da ka West Jaintia Hills District Cricket Association (WJHDCA) da kaba pynliem iaka Young Lad’s CC da 6 wicket haka jingialehkai haka pool B ha madan Khliehtyrshi haka 3 tarik Jymmang.

Ka Ummulong kala jop iaka toss bad kala jied ban ball shuwa bad kala lah ba kan tehlakam iaki nongtied ka Young Lad’s ban kamai run tang 110/7 na ka 20 over.

U kapten ka Young Lad’s Dathrangki Pariat ula ialehkai bha bad marwei ula synniang sha u sup u thiar kamai run ka kynhun 46 run na ka 46 ball ryngkat bad saw tylli ki boundary bad ka six. U Eshan Siangshai ula kamai 19 run bad hadien nangne ki nongtied ka Young Lad’s ki la khyllem uwei hadien uwei.

Na ka bynta ka Ummulong Wellmanson Passah bad u Heimon Lyngdoh kila khur mar ar wicket.

Haba beh iaka thong ka Ummulong kala jop da kaba suk da kaba kamai 111/4. U Aaron Lamare ula lam lynti iaka kynhun ban beh ia kane ka thong bad neh haduh ba kut khlem liem da kaba synniang 48 run na ka 38 ball da kaba khyrwit hynriew tylli ki 4s bad ar tylli ki 6s. U Heimon ruh ula synniang 22 run.

Na kaliang ki nongkawang ball ka Young Lad’s u Maremdor Sutnga ula khur 2 wicket, hynrei um lah satia ban khanglad iaki nongtied ka Ummulong ban ioh khur iaka namjop.

Haba phai sha ka miej iakhein point, ka Ummulong Cricket Club ka don hakhlieh duh haka Pool B da kaba kamai 10-point na ki 6 sien ialehkai da kaba jop saw sien bad ar sien ym shym la lah ban rai iaka jop ka rem (NR). Ka Mowkaiaw CYC kyrdan ba ar 6 point na ki 4 sien ialehkai, bud sa ka Phramer CC 5 point, Young Lad’s ruh 5 point. Khliehtyrshi SC 3 point na 4 sien iakhun, katba ka Moodymmai SC 2 point bad Evergreen Mukhla Mission kala neh ha trai duh da kaba kamai 1 point.

Ha Pool A, West Jaintia Police CC kala tam ia kiwei da kaba khur 8 point na ka 5 sien ialehkai, bud ka Lion S&YA bad Mupliang SC mar 6 point. Northeast A.U (ATS), Khimusniang SC and Evergreen SC & CC mar 2 point.