Bteng khur jingjop ka Mawlai SC ha ka lympung SPL; dang bat ia ka kyrdan ba nyngkong

Syllad | The Rising MeghalayaFebruary 26, 2025

Ka Mawlai SC ka la bteng ban lamkhmat ha ka lympung ialehkai OC Blue Shillong Premier League da kaba pynliem ia ka Rangdajied United FC da 1-0 ha ka jingialehkai kaba la long haka 25 tarik Rymphang ha madan SSA First Ground, Polo.

Hashwa kane, ka Langsning FC ka la lah ban pynliem noh ia ka Laitkor SC da 1-0 ban ioh bat ha ka kyrdan kaba saw.

U Khrawkupar Jana u la ioh ban pynkhih jar ha ka minit kaba (36) na ka bynta ka Mawlai, katba u Melambha Shabong u la ioh ban thep ia ka shi kol na ka bynta ka Langsning ha ka minit kaba (90’+2).

Ka jingjop jong ka Mawlai ka la wan long hadien ka jingiakhun kaba jwat bha bad kaba la pynduh lad noh ia ka Rangdajied kaba don ha ka kyrdan kaba lai bad ban pynkhreh ban ioh rah ia ka nam lahduh ha ka lympung OC Blue SPL 2024.

Da kaba sah satang artylli ki jingialehkai ban iakhun ka Rangdajied kam don lad shuh ban dang tam ia ka Mawlai kaba la kamai 41 poin. Ka jingiakhun kaba dang sah ka dei satang bad ka Shillong Lajong FC kaba sah shadien tang 5 poin ia ka Mawlai. Katba ka Langsning ka la ioh  biang ha ka kyrdan kaba saw da kaba pynliem noh ia ka Laitkor bad kaba la khur da 24 la 23 poin. Watla katta ka Laitkor ka dang don  sa kawei ka jingialehkai kaba kan dang iakhun.

Ka jingialehkai mynta ka sngi 26 tarik Rymphang kan long tang hapdeng ka Sawmer SC pyrshah ia ka Ryntih FC ha ka por 3 baje nohphai sngi.