Bteng khur jingjop ka Mawlai SC da kaba pynliem noh ia ka Langsning da 1-0 ha ka lympung SPL

Syllad | The Rising MeghalayaJanuary 9, 2025

Ka lahduh jong ka samoi ba la dep, ka Mawlai SC ka dang iai bteng ban khur ia ka jingjop da kaba pynliem noh ia ka Langsning FC da 1-0 ha ka lympung ialehkai OC Blue Shillong Premier League 2024 ha madan SSA, First Ground, Polo ha ka 8 tarik Kyllalyngkot.

Ha ka jingialehkai kaba mar ia aireng u Khrawkupar Jana u la ioh ban thep ia katei ka shi kol ha ka minit kaa 70 bad pynthikna syndon ia ka Mawlai ba kan ioh khur ia ka 3 point. Da kane ka jingjop myna ka Mawlai ka la ioh 19 point na ki hynniew tylli ki jingialehkai bad kala tam da 3 point ia ka Shillong Lajong kaba la wan ha ka kyrdan ka ba-ar.

Ka Langsning ka la neh ha ka kyrdan kaba phra da kaba ioh 7 point bad iakhaid bad ka Nongthymmai SC, hynrei ka Langsning ka la tam kham shakhmat namar ka jingioh thep bun kol.

Ha kane ka jingialehkai, ka Langsning mar ia sdang ka jingialehkai ka la ioh ia ka kabu tang ha ka minit kaba ar ban pyrshang ba ioh pynkhih jar lyngba u Daohipaia Rymbai hynrei ia kaba u rang ap kol ka Mawlai u Lambhamiki Lamare u la lah ban iada tyngeh.

Ka Mawlai ka la hap ban pynmih bujli ia arngut ki rangialehkai ha ka kylla step, kata da kaba wanrah ia ki rangialehkai ba tbit kiba kynthup ia u Donald Diengdoh bad u Dibinroy Nongspung, hynrei kim shym la lah satia ban thaw pyrthei.

Hynrei, dei ha ka kylla miet ba ka Mawlai ka la lah ban ialehkai kham bha ha kaba ki rangialehkai ka Langsning kim shym la lah ban tem ia ka bol, bad ha kaba khatduh ka Mawlai ka la lah ban ioh ban thep ia ka shi kol da kaba suk ha ka minit kaba 70 bad pynskhem syndon ia ka jingjop.

Kane ka lympung ialehkai kan bteng biang ha ka 14 tarik Kyllalyngkot ha kaba ka Rangdajied United FC kan iakhun pyrshah ia ka Sawmer SC ha ka por 11 baje mynstep, katba ka Shillong Lajong kan iakhun pyrshah ia ka Laitkor ha ka por 2:30 nohphai sngi.