Bteng khein beain ia ka HNLC ba sngap mynthi ia ka jingkhot iakren ka sorkar: Paul

Syllad | The Rising MeghalayaMay 30, 2025

U Nongaiktien ka Sorkar MDA uba dei ruh u Myntri Sorkar u Bah Paul Lyngdoh u la ong ba ka jingbteng ban khein beain pyrshah ia ka seng kieng atiar Hynniewtrep National Liberation Council (HNLC) sa na ka bynta san snem ka dei namar ka jingbym ai ia ka jubab kaba biang halor ka jingkhot kaba iai bteng jong ka sorkar ban sdang biang ia ka jingiakren iasuk. 

“Ngi long kiba kloi ban pynlong ka jingiakren. Ha ka jingshisha, ka jingiakren bad kane ka seng kaba la shah khein beain kan long shi sienjam shakhmat ban weng noh ia ka jingkhang ia ka seng hynrei namar ba kim shym la ai ia ka jubab kaba biang kumta kane ka jingkhein beain ka la bteng,” ong u Bah Paul haba kren sha ki lad pathai khubor haka 29 tarik Jymmang.

“Ka jingkhot ka dang plie haduh mynta,” u la bynrap.

Ka UAPA Tribunal dang shen ka la rai ban pynksan ia ka rai jong ka Ministry of Home Affairs’ ban khein beain biang ia ka HNLC sa na ka bynta san snem.